غنچوں کو کچلتے دیکھا

کس تکبر سے تجھے راہ پہ چلتے دیکھا
تیرے قدموں تلے غنچوں کو کچلتے دیکھا

تلخ لہجہ تو شروع دن سے تیری عادت تھی
آج لفظوں میں تجھے زہر اگلتے دیکھا

بے رخی نظروں میں رکھنا تو تیرا شیوہ تھا
آج شعلوں کو بھی آنکھوں سے برستے دیکھا

خود کشی کے سوا کچھ اور نہ سوجھا اسکو
بھوک کے مارے جو بچوں کو بلکتے دیکھا

اب تلک بنئے ہی دیکھے تھے ٹکوں پر مرتے
آج پیسوں پہ تیرا دم بھی نکلتے دیکھا

تجھ کو روتے ہوئے دیکھا تو وہ دن یاد آیا
میں نے کلیوں سے تھا شبنم کو ڈھلکتے دیکھا

عید کے دن نئے کپڑوں کی دکاں پر میں نے
یاس و افلاس کے ماروں کو بھی تکتے دیکھا

ڈگڈگی والے کے مٹی کے کھلونوں کے لیئے
کتنے معصوم گلابوں کو مچلتے دیکھا

جو بلاتا تھا ہمیں راہ خدا پر کل تک
اس مبلغ کو بھی کل راہ بدلتے دیکھا

لوگ کہتے ہیں جسے حاتم ثانی اشہر
اس سخی کو بھی غریبوں سے الجھتے دیکھا