ماہیے

ماہیے
آجا تو جھنگ ماہیا
ہیر کے روضے پر
بن مست ملنگ ماہیا

سب خلقت دنگ ماہیا
کید و کی عمل داری
ہر شہر ہے جھنگ ماہیا

تصویر سجا دنیا
ہم پیا ر کے ماروں پر
تعزیز لگا دنیا


محروم رہا برسوں
اک پیار کے بندھن میں
یہ دل ہی جلا برسوں

خوش رنگ بہاروں میں
ہم ہار گئے سب کچھ
آنچل کے نظاروں میں

باغوں میں بہار آئی
ہر پریم کہانی کا
انجام ہے رسوائی

ہر سمت پکار آیا
جب شکل تیری دیکھی
اس دل کو قرار آیا

جگ رین بسیرا ہے
زرومال کا ناٹک سب
تیراہے نہ میرا ہے

سن دل کی ترنگ ماہیا
سب شیریں مقالوں سے
آکر مل جھنگ ماہیا

دل کی یہ امنگ ٹھہری
شیرافضل ، طاہر اور امجد کی
دلی تو جھنگ ٹھہری

عیدیں شب راتیں ہیں
پھر چاند سے ملنے کی
یہ ساری گھاتیں ہیں

پیار نبھانے کے
مر کر بھی زندہ ہیں
کردار افسانے کے

حالات زمانے کے
اک بار تو دیکھ ہی لو
لمحات دیوانے کے

ہر سمت صفائی ہو
دل زندہ رہے کیسے
جب چاند ہر جائی ہو

یہ دن ہے منگل کا
انصاف تو عنقا ہے
قانون ہے جنگل کا

گھبراؤ نہ تنگی سے
جب پیار پتنگ پیچے
پڑ جائیں جھنگی سے

ہر سمت اندھیرے ہیں
بے لوث کہاں ساتھی
سب فصلی بٹیرے ہیں

چتڑی کے دانے ہیں
کالے دھن والے
جھلے بھی سیانے ہیں