میں آنکھیں بیچنا چاہوں

میں آنکھیں بیچنا چاہوں
کہ اِن میں خواب ہیں تیرے
میںتیرے خواب کیوں دیکھوں
نئے عذاب کیوں دیکھوں
یہی عذاب کیا کم ہے
تیری یادوں میں جلتا ہوں
تجھے پانے کی خاطر
میں نئے چہرے بدلتا ہوں
مگر تم بیوفا ہو جو میرے
خونِ تمنا کو جلا کر راکھ کرتے ہو
میرے دل کے نِہاں خانوں میں
انگارے سے بھرتے ہو
میں تجھ کو چاہوں تو کیونکر
کہ میں نے تجھ سے کیا پایا؟
وہی کچھ درد کے لمحے
جو تو نے مجھ کو بخشے ہیں
وہی کچھ دیپ اشکوں کے
جو اب آنکھوں میں جلتے ہیں
وہ تیری یاد کے خنجر
جو گھائل دل کو کرتے ہیں
مجھے تجھ سے شکایت ہے
مگر میں کیا کروں کہ
میں تجھے کچھ کہہ نہیں سکتا
جفا کا زہر پی کر بھی
میں تجھ بِن رہ نہیں سکتا
میں آنکھیں بیچنا چاہوں
مگر آنکھیں میں کیوں بیچوں
کہ اِن میں خواب ہیں تیرے
میں تیرے خواب کیوں بیچوں
یہ تیرے خواب ہی تو ہیں
جو میرے دل کی دھڑکن ہیں
اور اپنے دل کی دھڑکن کو
بھلا کب بیچ سکتا ہوں
میں آنکھیں بیچنا چاہوں
مگر کب بیچ سکتا ہوں