|
کون کہتا ہے پاکستان غریب ملک ہے، گزشتہ 5ماہ میں ہم
38 ارب روپے کی تو صرف چائے پی گئے ہیں۔یہی نہیں پاکستان بیورو آف
اسٹیٹسٹکس کے مطابق ہمارا چائے سگریٹ کا سالانہ خرچہ دو سو ارب روپے سے
زائد ہے جو زیادہ ترکینیا، انڈیا، بنگلہ دیش، سری لنکا اور انڈونیشیا سے
منگوائے جاتے ہیں۔خوردنی تیل ہماری روزمرہ ضرورت کا اہم جزوہے جو ہم ہر سال
2 کھرب 85 ارب روپے خرچ کر کے باہر سے منگواتے ہیں۔یہی نہیں ہم دالوں کی مد
میں سالانہ 1 کھرب 54 ارب روپے خرچ کرتے ہیں جو زیادہ تر آسٹریلیا اور
کینیڈا سے منگوائی جاتی ہیں۔ایسا نہیں ہے کہ ہمارے زرعی ملک میں یہ فصلیں
پیدا نہیں ہوسکتیں، بلکہ پاکستان کی آب و ہوا اور زمین ان فصلوں کی پیداوار
کے لیے بہترین ہے لیکن حکومت کی ناقص زرعی پالیسیوں اور کسانوں کی عدم
دلچسپی کے باعث ہمیں یہ فصلیں باہر سے منگوانی پڑ رہی ہیں۔اہم بات یہ کہ
اگر ہم صرف ان چار فصلوں میں ہی خود کفیل ہوجائیں تو سالانہ 47 ارب ڈالرز
بچا سکتے ہیں۔اگر اس وقت ہم ملکی معیشت پر نظر ڈالیں تو ہمارا تجارتی خسارہ
33 ارب 84 کروڑ ڈالرز ہے جسے پورا کرنے کے لیے کسی کے آگے ہاتھ پھیلانے کے
بجائے چند فصلوں میں خود کفیل ہونے سے بآسانی پورا کیا جاسکتا ہے۔
پاکستان میں عرصہ دراز سے گندم اور کپاس ملکی ضرورت کو پورا کرنے کے علاوہ
ہمارے لیے زرِمبادلہ کا بھی باعث رہی ہیں۔لیکن گزشتہ کچھ سال سے گندم کے
مصنوعی بحران کی وجہ سے ہمیں گندم روس سے منگوانی پڑ رہی ہے اور کپاس کی
پیداوار بھی گیارہ ملین گانٹھوں سے صرف چھ ملین گانٹھوں تک محدود ہوکر رہ
گئی ہے۔اس صورتحال میں ہمیں کسانوں کو تیل دار اجناس، دالیں اور تمباکو
جیسی منافع بخش فصلیں لگانے کی طرف راغب کرنا چاہیے تاکہ ان کی آمدنی میں
اضافہ ہوسکے۔آپ کو شاید یہ جان کر حیر ت ہو کہ پاکستان تمباکو کی فی ایکڑ
پیداوار کے لحاظ سے دنیا میں دوسرے نمبر پر ہے۔ اسی طرح پاکستان میں اعلیٰ
معیار کی دالیں اور خوردنی تیل پیدا کرنے کا بھی پوٹینشل موجود ہے۔جہاں تک
چائے کا تعلق ہو تو مانسہرہ، سوات اور ایبٹ آباد جیسے علاقوں میں 20 سال
قبل چائے کی کاشت کے کامیاب تجربات کیے گئے ہیں لیکن حکومتوں کی عدم توجہی
کے باعث اس پراجیکٹ کو عام کاشتکاروں تک نہیں پہنچایا جاسکا۔حکومت نے تیل
دار اجناس کے فروغ کے لیے متعدد پیکجز کا اعلان کیا ہے لیکن اس کا دائرہ
کار بڑھانے کی ضرورت ہے تاکہ چھوٹے کاشتکار اس سے زیادہ فائدہ اٹھا
سکیں۔بھارت میں 23فصلوں پر حکومت کی طرف سے سپورٹ پرائس دی جاتی ہے جس کی
وجہ سے کسان ان فصلوں کو لگانے میں ہچکچاہٹ کا مظاہرہ نہیں کرتا۔ہماری
حکومت بھی چاہیے کہ تیل دار اجناس، دالیں،چائے اور تمباکو جیسی فصلوں پر
سپورٹ پرائس کا تعین کرے تاکہ کسان ان فصلوں کی طرف بلاخوف متوجہ ہوسکے۔
ہر نئی حکومت آتے ہی ''معیشت تباہی کے دہانے'' پر ہونے کا رونا روتی ہے،
قرضے لیتی ہے، ترقیاتی پیکجز کی آڑ میں کاروباری حضرات اور صنعتکاروں کو
سہولیات دیتی ہے لیکن زرعی شعبہ نظرانداز کر دیا جاتا ہے۔اس سارے کھیل میں
سیاستدانوں کے منظورِ نظر خاص طبقہ تو امیر سے امیر ترین ہوتا جاتا ہے لیکن
ملکی معیشت کا بیڑا غرق ہوجاتا ہے۔عمران خان نے جب اپنی پہلی تقریر میں
زرعی پالیسیوں کی بہتری کا عندیہ دیا تو مجھ سمیت کروڑوں کسانوں اور زراعت
کے طلبہ کو امید ہوچلی تھی کہ ستر سال سے نظرانداز کیے گئے زرعی شعبہ کا اب
ترقی کا سفر شروع ہوگا لیکن افسوس نئی حکومت کی زراعت سے عدم دلچسپی کے
باعث یہ خوش فہمی ملیامیٹ ہوتی معلوم ہورہی ہے۔اگر آپ کینسر کا علاج کرنے
کے بجائے اپنے سردرد کے لیے فکر مند ہیں تو آپ کو دردناک انجام سے کوئی
نہیں بچا سکتا۔ بالکل اسی طرح اگر ہم زرعی ملک میں زرعی مسائل کا علاج نہیں
کرتے تو ہماری صنعتیں، کاروبار اور معیشت کبھی بھی مستحکم نہیں ہوسکتے۔نئی
حکومت کے مطابق ان کی پہلی ترجیح قومی معیشت کی مضبوطی ہے لیکن انہیں
سمجھنا ہوگا کہ پاکستان کی معیشت زراعت کی ترقی سے مشروط ہے، ہمیں آج نہیں
تو کل زرعی انقلاب لانا ہوگا ورنہ ہماری صنعتیں تو اجڑ ہی چکی ہیں
خدانخواستہ زراعت بھی قصہ پارینہ بن جائے گی۔
٭٭٭٭٭٭٭
|