Aeh Puttar Hattan Te Nahi Wikde

“Agar Pak Foj Sy Koi “Walidad” Per Jaey Ga To Wo Sirf Main Hoon Ga, Meri Khawashish Hai Or Main Yeh Sabit Bhi Keru Ga K Walidad Gaoon K Her Pather Or Zarray Per Pehla Qadam Mera Ho Ga Jo Us Main Aman Or Khushian Laye Ga….”

Yeh Hatmi Alfaz Major Khurram Ehsaan K Hain Jis Ne Razakarana Tor Per Khud Ko” Operation Brekhna” K Liye Paish Kia. Brekhna Pashto Zuban Ka Lafz Hai Jis Ka Matlab Aasmani Bijli Ban K Barasna Hai.

“Walidad” Mohmand Agency Main Suran Or Mitai Ki Wadiyo Main Seena Tanay Kharay Aik Buland O Bala Pahar Hay Jis Ki Oonchai 6400 Meter Hai. Is Ki Maghrabi Dhalwan Ka Aik Bara Hissa Afghanistan Main Dakhil Hota Hai. . Mohmand Agency Main Sher Pasando Ki Karwaiyo Ka Bra Markaz Yahi Pahari Ilaqa Tha ..

Muhammand Agency Iqtasadi Or Muashi Tor Per Hi Nahi, Taraqiati Tor Bhi Aik Pasmanda Ilaqa Hai. Yahan Askariat Pasandon Ka Na Sirf Sakht Qabza Tha Bulkay Yahan Per Aslahay Or Barood Ka Istimaal B Bay Daregh Kia Jata Tha. In Askariat Pasando Main Tehreek-E-Taliban K Sath Sath Ghair Mulki Garaoh Bhi Mutahark Thay . Tehreek-E-Talibaan Yahan Faal Sab Sy Bari Tanzim Thi Jis Ne Yahan K Maqami Logo Ko Yarghamal Bana Rakha Tha.

Taliban K Qabzay Ki Waja Se Yahan K Logo Ko Iqtasadi Or Muashi Pareshanaio Ka Samna Kerna Para. Hasool-E-Ilm Per Pabandiyan Ayed Ki Gayeen, Larkio K School Tabah Kiay Gay, Choti Choti Bato Per Logo Ko Be.Shumar Or Sakht Sazayain Di Gayee. Mukhtasar Yeh K Askariat Pasando Ne 1000 Saal Se Apni Dagar Par Chalti Zindgi To Tehs Nehhs Kar K Rakh Dia.

Ilaqay Ki Sangeen Soorat-E-Haal Ko Mad-E-Nazer Rakhtay Huay Pak Foj Ne 77 Bergade Ko Walidad Ko Shiddat Pasando Se Pak Kernay Ka Hukm Dia Jis K Nateejay Main 6 April 2011 Ko 35 Azad Kahsmir Regment Ki Bilal Company Ne Major Khurran Ehsaan Ki Zair-E-Qayadat Walidad Pahar Per Paish Qadmi Shuru Ki. Poori Raat Ki Kathan Musafat K Baad Al-As-Subah Khoon Raiz Markay Ka Aghaz Hua. Yeh Walidad Ko Fatah Kernay Ki Pehli Kawish Thi Jo Nakaam Hui Or Is K Ewaz Bilal Company Ko 12 Shahadton Ka Qeemti Nazrana Paish Kerna Para.

Isi Markay Ki Doosri Koshish 23 May 2011 Ko Ki Gayee Jis Main Sher Pasando Ko Nuqsan To Uthana Para Mager Pak Foj Ko Kamyabi Naseeb Na Ho Saki. 35 Azad Kashmir Regment Ki Bilal Company Sab Se Buland Hosla Or Mazboot Mani Jati Hai. Yehi Wajah Hai K Is Company K Jawano Ne Apnay Commander Major Khurram Ki Awaz Per Aik Mertaba Phir Labaik Kaha Or Aik Hi Raat K Waqfay K Baad Phir Se Apnay Hoslay Mutmaja Kertay Huay 25 May 2011 Ko Walidad Ki Cherhai Ka Mansooba Banaya. Isi Doran Jab Unit K Senior Afsaran In Jawano Ki Hosla Afzai K Liye Aye To Sab Ne Ber Mala Yeh Keh Dia “ Walidad To Kya Major Khurram Hamain Jab B Or Jahan B Kahay Ga Hum Jayain Gay”. ALLAH Ko Filhaal In Ki Kamyabi Manzoor Na Thi Or Company Aik Mertaba Phir Apna Hadaf Hasil Kernay Main Naakaam Rahi, Laikin Is Baar Sb Ne Wapis Lotnay Ki Bajaye Pahar K Aik Qudarti Aar Main Panah Le Li.

Aisi Kya Wajah Thi K Pay Der Pay 3 Nakamiyo K Bawajood B In K Hoslay Past Na Huay? Is Sawal Ka Jawab Major Khurram Ne In Alfaaz Main Dia. “Jang Bila Shuba Sipahi Ne Hi Lerni Hoti Hai Laikin Wo Apnay Commander Ko Dekhta Hai Or Lernay Ko Tayyar Hota Hai. Main Ne Sirf Inhain Lernay Ko Tayyar Kia Or Baki Madad ALLAH Ne Ki”

Major Khurram Hi Ki Company K Aik Hawaldar Ka Un K Baray Main Kehna Hai “ Hum Aaj Tak Jurrat Or Bahaduri K Jo Waqyat Tareekh Ki Kitabo Main Perhtay Aye, Major Khurram Hamaray Samnay Unki Amali Misaal Banay. Waqti Nakamio K Bawajood B Hum Sirf Apnay Commander Ka Chehra Dekhtay Or Hamari Be.Basi Door Ho Jati”

Teesri Kawish Main Major Khurram Ne Apnay Aik Behtreen Sathi Captain Khizer Satti Ko Khoya Or Wo Aik Lamha Tha Jab Us Ki Ankhain Ashk Baar Hui, Mager Wo Janta Tha K Wo Sipah Salaar Hai, Ager Wo Kamzor Pera To Baki Sab B Himmat Kho Dain Gay Is Liye Us Ne Apni Company K Sab Jawano Se Kaha “ Ab Hum Main Se Us Waqt Tak Koi Nahi Roay Ga Jab Tak Hum Walidad Ki Choti Tak Pohanch Nahi Jatay, Jab Hum Is Main Kamyaab Hon Gay To Mil Ker Apnay In Pyaro Ki Qurbani Ko Salam Paish Kerain Gay”

Major Khurram Ehsaan Or Bilal Company K Jawano K Sir Per 12 Shaheedo K Khoon Ka Qarz Tha Jisay Chukanay K Liye Unho Ne Khud Se Yeh Ehad Kia K Wo Dobarah Walidad Per Ayain Gay Or Sher Pasando K Is Gerh Per Pakistan Ka Sabz Hilali Percham Lehrayain Gay Or Ager Wo Aisa Na Ker Sakay To In Ki Qabrain Walidad Per Ban Jayain Gi. Is Ehad Ki Takmeel K Liye Pehlay Wadi-E-Sooran Ka Ilaqa Sher Pasando Se Pak Kia Gaya Or Phir Walidad Ki Taraf Dobarah Paish Qadmi Shuru Hui.

18 June 2011 Ko Faisla Kun Hamlay Ka Mansooba Bana Or Sahee Mano Main Major Khurram Or Un K Saathi Askariat Pasando Per Asmani Bijli Ben Ker Giray. Sher Pasando Ne Walidad Ko Bherpoor Tareeqay Se Apnay Madfooa Maqam K Tor Per Tayyar Ker Rakha Tha Or In K Khayaal Main Pak Foj Ka 2 Wajoohat Ki Bina Per Is Pahar Per Qabza Kerna Namumkin Tha, Awal Yeh K Is Pahar Ki Cherhai Bht Mushkil Thi Or Doem Yeh K Walidad Ka Quderti Defah Bht Mazboot Tha.

Sarhay 5 Ghantay Ki Is Khooni Larai K Baad Jab Pak Foj Askariat Pasando K Siro Per Ja Pohanchi To Unho Ne Aslaha Chor Ker Gehri Khayeeyo Main Chalang Laga Di Or Bil Aakhir Subah 3:30 Bajay Walidad Ki Choti Per Pakistan Ka Percham Lehraya Gaya. Alhamdullilah

Operation K Doran Honay Wali Mushkilat Ka Ziker Kertay Huay Major Khurram Ne Bataya “ Aik Hi Waqt Main Walidad Pahari Per Cherhna Or Is Per Qabiz Hona Na-Mumkin Tha Kyu K Sher Pasand Hum Se Oper Thay Or Hum Neechay Se Un Ki Taraf Berhtay Thay To Hum Per Golio Ki Bochaar Ker Di Jatii, Pahaar Per Aisay Maqam Bhi Aye Jab Dono Hatho Se Pathero Ko Paker Ker Cherhna Perta Aisay Main Jawano Ne Apnay Hathyaar Kandhay Per Dalay Mager Cherhai Jari Rakhi. Aik Or Eham Masla Hamain Pani Ki Adam Farahmi Ka Tha, June K Sakh Garam Mosam Main Jawano Se 30 Ghantay Musalsal Baghair Pani K Larai Ki, Mager Hum In Mushkilaat Ko Khatir Main Na Latay Huay Berhtay Gay Or Dushmano Ko Rah-E-Farar Ikhtiyar Kernay Per Majboor Ker Dia”

Operation Per Rawana Honay Se Pehlay Anay Wali Major Khurram Ehsan Ki Walida Ki Call Un K Jazbay Ki Puktaqi Ka Bais Bani. Fone Ka Speaker On Rakha Gaya Ta K Tamam Jawano Ko Yehi Ehsas Milay K Unki Walida Un Se Mukatib Hain. “ Kya Haal Hai Mere Sher Jawano Ka?” Yehi Aik Jumla Tamam Jawano Ka Lahu Germanay Ko Kafi Tha. Major Khurram Ki Walida Ne Apny Betay Or Os Ke Sathion Ko Pigham Dia “ Main Janti Hu Tumharay Pas Zyada Waqt Nahi Hai, Bas Yeh Yaad Rakhna K Mujhay Tumhari Zindgi Itni Aziz Nahi Jitna Watan Se In Sher Pasando Ka Khatma Zaroori Hai. Mera Yeh Paigham Mere Sab Sher Jawano Tak Pohancha Do”

Sargodha Se Talluq Rakhnay Wala Yeh Mard-E-Mujahid Jo Bazahir Foladi Hoslay Ka Malik Nazer Ata Hai Der Haqiqat Bht Hassas Hai. Is Ka Andaza Is Baat Se Lagaya Ja Sakta Hai K Ksi B Operation Per Janay Se Pehlay Wo Apnay Ghar Walo Se Baat Sirf Is Liye Nahi Kerta K Uska Dil Na Kamzor Per Jaye, Laikin Us Ka Yeh B Man’na Hai K Hum Jis Ki Rah Per Niklay Hain Wohi Zaat Hamaray Ghar Walo Ki Hifazat Keray Gi

Maj Khurum Ne 2 November 1981 Ko Aik Foji Gharanay Main Hi Ankh Kholi Jahan Is Ki Perwaraish In Khatoot Per Ki Gayee K Tum Aik Sipahi Ho Or Tumhain Jihaad Kerna Hai. Bachpan Main Be Inteha La-Ubali Or Sharer Honay K Bawajood Classroom K Her Maiz Per ARMY Likhnay Walay Is Bachay Ne Shayed Kabhi Socha B Na Ho K Wo Apnay Watan K Liye Kuch Aisa Ker Guzray Ga K Sab Us Per Rashk Kerain. Maj Khurram Ne Kam.Sini Main Hi Aik Khawab Main Khud Ko Maidan-E-Jang Main Ghoray Per Sawar Nabi-E-Akhir Uzaman Hazrat Muhammad Mustafa S.A.W K Hamrah Ghazwa Main Shareek Dekha.

Talib-E-Ilmi K Zamanay Main Apnay School Or College K Behtreen Athlete Rahay Or Sirf Is Wajah Sy Apni Fitness Per Kbhi Samjhota Nahi Kia K Onhain Foj Main Jana Tha. April 2002 Main Pak Army Se Wabastah Ho Ker 35 Azad Kashmir Regiment Main Shamooliat Ikhtiar Ki Or Mulk K Mukhtalif Ilaqo Main Tainaat Honay K Baad April 2011 Main Muhammand Agency Bhaijay Gay.

Major Sahib K Walid Retired Col Ahsaan Bhi Foj Main Apni Khidmaat Ser Anjaam De Chukay Hain, Apnay Baitay K Baray Main Izhaar-E-Khayaal Kertay Huay Unho Ne Bataya” Is Operation Main Mera Aik Nahi Do Baitay Shamil Thay Laikin Khurram K Liye Main Yehi Kehta Hu K Yeh Bana Hi Army K Liye Hai Kyu K Yeh Hamesha Se Mutaharrik Or Pur-Josh Raha Hai. Operation Per Bhaijtay Waqt Hum Sab In K Liye Dua Go To Thay Hi Laikin Zyadah Eham Baat Yeh Thi K Yeh Kamyaab Hon, Phir Chahay Yeh Shadat Ka Taaj Sajatay Ya Phir Bakhair O Afiat Wapis Lot’tay”

Major Khurram Ki Ehlia Se Jab Un K Baray Main Poocha Gaya To Un K Alfaaz Kuch Yoon Thay” Main Ne Khurram Ko Kabhi Aisay Mamlaat Main Peechay Hat’tay Nahi Dekha Bul K Wo Aisay Ksi Maqsad K Liye Khud Apna Naam Paish Kertay Hain, Yehi Wajah Hai K Jab Unhain Is Operation K Liye Muntakib Kia Gaya To Wo Bohat Khush Thay K ALLAH Ne Inhain Yeh Moqa Dia K Wo Apnay Watan K Liye Kuch Ker Sakain” Inhain ALLAH Ne 2 Bht Payri Betiyo Se Nawaza Hai. Apni Zindgi K Behtreen Lamhaat Ka Ziker Kertay Huay Unhon Ne Aik Waqya Ka Tazkirah Kia Jis Ne Is Raz Sy Pardah Othaya K Wo Ab Tak Kaisay Salamat Rahay.

“ Jab Main Chutti Pe Ghar Aya To Raat Ko Sonay Se Pehlay Main Ne Apni Baitiyo Ko Aik Lambi Dua Kertay Suna Jis Main Wo RAB Tala Se Mujh Samait Tamaam Fojio Ki Hifazat Or Salamti Maang Rahi Theen. Wo Dua Sun Ker Mujhay Yaqeen Ho Chala K Ghaib Se Hamari Madad Kin Ki Arzi Per Ki Ja Rahi Thi”

Is Shujaat Or Himmat K Nateejay Main Major Khurram Ko Tamgha-E-Basalat Se Nawaza Gaya. 35 Azak Kashmir Regment Main Yeh Aizaz Kul 12 Afsaran Ko Dia Gaya Jis Main Se Hayat Sirf Major Khurram Hi Hain. Is Ki Aik Eham Wajah Shayed Yehi Hai K Unhon Ne Try Try Again K Maqoolay Pe Sakhti Se Amal Kertay Huay Na-Mumkin Ko Mumkin Ker Dikhaya.

Waldain Ko Aisay Sapoot Perkyu Na Fakher Ho Jis Ne Hamesha Apni Zaat Per Mulki Salmiat Ko Ehmiat Di, Sipahi Aaisay Commander Ki Ita-At Kyu Na Kerain Jis Ne Her Mushkil Ki Taraf Pehla Qadam Khud Uthaya Or Sab K Liye Misaal Bana, Pak Foj Aisay Janbaaz Ko Kyu Na Aizaaz Bakshay K Jis Ne Apnay Ehad Ki Pasdaari K Liye Her Mumkin Koshih Kertay Huay Usay Kamyaab Banaya. Madr-E-Watan K Aisay Tamam Sar Farosho Ko SALAM
………………………………………………………….
Pull Quotes
“ Jab Main Chutti Pe Ghar Aya To Raat Ko Sonay Se Pehlay Main Ne Apni Baitiyo Ko Aik Lambi Dua Kertay Suna Jis Main Wo RAB Tala Se Mujh Samait Tamaam Fojio Ki Hifazat Or Salamti Maang Rahi Theen. Wo Dua Sun Ker Mujhay Yeh Baat Samjh Aa Gai Keh Hamari Madad Kin Ki Arzi Per Ki Ja Rahi Thi”

“Jang Bila Shuba Sipahi Ne Hi Lerni Hoti Hai Laikin Wo Apnay Commander Ko Dekhta Hai Or Lernay Ko Tayyar Hota Hai. Main Ne Sirf Inhain Lernay Ko Tayyar Kia Or Baki Madad ALLAH Ne Ki”

“ Ab Hum Main Se Us Waqt Tak Koi Nahi Roay Ga Jab Tak Hum Walidad Ki Choti Tak Pohanch Nahi Jatay, Jab Hum Is Main Kamyaab Hon Gay To Mil Ker Apnay In Pyaro Ki Judai Per Royain Gay”

Major Khurram Ki Walida Ne Apny Betay Or Os Ke Sathion Ko Pigham Dia “ Yaad Rakhna K Mujhay Tumhari Zindgi Itni Aziz Nahi Jitna Watan Se In Sher Pasando Ka Khatma Zaroori Hai. Mera Yeh Paigham Mere Sab Sher Jawano Tak Pohancha Do”