عزت مآب رحمان ملک صاحب گزشتہ
ڈیڑھ ماہ سے چیخ رہے تھے بھائی ضمنی الیکشن سے باز آ جاؤ ملکی سلامتی کو
خطرہ ہے۔ رحمان ملک صاحب کی چھٹی حس بہت تیز ہے اور انہیں آج تک کبھی کوئی
غلط اطلاع نہیں آئی۔۔۔۔۔۔۔!سو دیکھ لیجیئے رحمان ملک صاحب کی رپورٹس کے عین
مطابق ملک میں پے در پے دہشتگردی کے کئی افسوسناک واقعات رونما ہوئے اور
پھر لاہور میں یکے بعد دیگرے ہونے والے ایک ہی دن دہشتگردی کے واقعات نے تو
میرے دل و دماغ پر جناب رحمان ملک کی زود فہمی کی دہشت بٹھا دی ہے!رحمان
ملک صاحب اتنے با خبر آدمی ہیں کہ سمجھنا ۔۔۔۔خارج از بساط۔۔۔۔۔۔ہے موصوف
ادھر کہتے ہیں کہ دہشت گردی کی اطلاع ہے ادھر دہشت گردی وقوع پزیر ہو جاتی
ہے۔۔۔۔۔۔۔۔۔۔!لاہور میں ہونے والے ایف آئی اے بلڈنگ، مناواں ٹریننگ اور
بیدیاں ایلیٹ سنٹر پر ہونے والے حملوں کے بعد ملک بھر میں سرچ آپریشن جاری
کیا گیا۔۔۔۔۔۔۔۔۔یہاں ایک بار پھر رحمان ملک صاحب کی حس جستجو جاگ اٹھی اور
اسلام آباد میں مدارس پر چھاپے مارے گئے۔ مگر یہ کیا دوسرے ہی روز ملک کے
تیز ترین اطلاعات موصول کرنے والے دماغ نے یہ کہہ دیا کہ مدارس پہ چھاپے
افغان طلبہ اور اساتذہ کی اطلاع پر مارے تھے جبکہ وہاں نہ کوئی افغان اور
نہ ہی کوئی قابل اعتراض مواد ملا۔ یاد رہے یہ میں نہیں خود رحمان ملک صاحب
فرما رہے ہیں میری سمجھ میں نہیں آتا کہ رحمان ملک صاحب کی اطلاع غلط کیسے
نکل آئی۔۔۔۔۔۔۔۔؟اور پھر بات یہیں ختم نہیں ہو جاتی بلکہ جمہوری صدر کے
کہنے پر رحمان ملک صاحب نے انتہائی جمہوری طریقے سے مولانا فضل الرحمان کو
فون کر کے یقین دلایا ہے کہ آئندہ چھاپے نہیں مارے جائیں گے۔۔۔۔۔۔۔۔۔!
کی میرے قتل کے بعد اس نے جفا سے توبہ
ہائے اس زود پشیماں کا پشیماں ہو نا
میری اطلاعات کے مطابق بینظیر بھٹو کی شہادت سے لے کر اب تک جناب رحمان ملک
کو ملنے والی تمام اطلاعات میں سے صرف یہ ایک اطلاع غلط ثابت ہوئی ہے۔ نہ
صرف غلط ثابت ہوئی بلکہ اس کی پاداش میں مولانا فضل الرحمان کو یقین دہانی
بھی کروانی پڑی کہ بھائی آئندہ چھاپے نہیں ماریں گے تم۔۔۔۔۔۔۔۔۔۔عیش۔۔۔۔۔۔۔۔۔۔کرو
اور مجھے بھی آرام کرنے دو۔۔۔۔۔۔۔۔۔!گویا ثابت ہوا کہ رحمان ملک صاحب کی
اطلاع بھی غلط ہو سکتی ہے۔ مجھے یاد ہے جب رحمان ملک صاحب بے نظیر بھٹو کے
سیکیورٹی ایڈوائزر تھے وہ تب بھی بہت ویل انفارمڈ آدمی تھے جبھی تو انہوں
نے سانحہ کارساز والے دن انکشاف کیا تھا کہ بی بی کے ٹرک پر جیمر لگے تھے
جو اپنے حیطہ کار میں الیکٹرانک نقل و حمل روک دیتے تھے مگر دھماکوں کے وقت
جیمر کام نہیں کر رہے تھے جس کا انکشاف رحمان ملک صاحب نے یوں کیا تھا کہ
اگر جیمر کام کر رہے ہوتے تو وہ اپنے موبائل فون سے سیکیورٹی اہلکاروں سے
بات نہ کر سکتے۔۔۔۔۔۔۔۔۔۔۔۔۔۔۔۔؟بلکہ رحمان ملک نے کہا تھا کہ ان کی نا صرف
سیکیورٹی والوں سے بات چیت ہوئی بلکہ انہوں نے سیکیورٹی والوں کو یہ بھی
کہا کہ جیمر کام نہیں کر رہے۔۔۔۔۔۔۔۔۔۔۔۔!مگر نا جانے کیوں پھر لیاقت باغ
میں محترمہ کی شہادت کے بعد ملک صاحب کی وہ مخصوص۔۔۔۔۔۔۔۔۔۔۔اطلاعاتی حس۔۔۔۔۔۔۔۔۔۔۔اور
چاق و چوبند طبیعت کہاں کھو گئی کہ آج تک محترمہ کے قتل کی تحقیقات کرنے
والی ٹیم کو انہوں نے یہ بھی بتایا کہ نہیں سانحہ کارساز والے دن جیمر کے
کام نہ کرنے کی اطلاع انہوں نے کس سیکیورٹی آفیسر کو دی تھی اور اسے بھی
شامل تفتیش کیا جائے۔۔۔۔۔۔۔۔۔۔۔؟ہاں اگر ملک صاحب نے ایسا کیا بھی ہو گا تو
غالباً گوشہ تنہائی میں کیونکہ جس طرح وہ ہونے والی دہشت گردی کی اطلاع
ہمیں براستہ چینلز پہلے پہنچاتے ہیں اس طرح انہوں نے یہ اطلاع ہمیں ابھی تک
نہیں پہنچائی۔۔۔۔۔۔۔۔۔۔!بہرحال بات ملک صاحب کی زود فہمی کی ہو رہی ہے
محترمہ کی شہادت کے بعد ملک صاحب کی یہ حس کافی بیمار نظر آتی رہی یہ
علیحدہ بات کہ مشیر بنتے ہی یہ حس عین ۔۔۔۔۔۔۔جمہوری۔۔۔۔۔۔۔۔انداز میں اچھل
کر باہر آ گری بلکہ پھر وزیر بننے کے بعد تو انتہا تک پہنچ گئی۔ مگر ایک
سوال ذہن میں کانٹا بن گیا ہے وہ یہ کہ رحمان ملک صاحب کا مدارس پر چھاپہ
غلط اقدام تھا یا فضل الرحمان صاحب کی۔۔۔۔۔۔۔۔۔بڑک۔۔۔۔۔۔۔۔۔غلط ہے اور اگر
فضل الرحمان کی بڑک غلط ہے تو رحمان ملک صاحب کی چھاپے نہ مارنے کی یقین
دہانی کو کیا کہیئے۔۔۔۔۔۔۔۔۔۔؟اور اگر ملک صاحب کی یقین دہانی غلط ہے تو
پھر یقین دہانی جس فون کی نسبت کرائی گئی اس فون کو کیا کہنا چاہیے۔۔۔۔۔!میں
کچھ نہیں کہوں گا کیونکہ۔۔۔۔۔۔۔۔۔۔۔۔۔جمہوریت بہترین انتقام ہے۔۔۔۔۔۔۔۔۔۔۔۔۔۔۔! |