دنیا میں منفرد اور دلچسپ چیزیں بھری پڑی ہیں جو کہ اپنے دیکھنے والوں کو تو متوجہ کرتی ہی ہیں ساتھ ہی سوشل میڈیا صارفین کی توجہ بھی حاصل کرتی ہیں۔
کچھ ایسی ہی چند تصاویر اور ان کے پس منظر میں موجود کہانیوں کے بارے میں آپ کو بتائیں گے۔
کشتی والی مسجد:
کراچی کے علاقے لیاری میں ایک ایسی مسجد موجود ہے جو کہ سڑک کے بیچ میں واقع ہے۔ اس مسجد کی خاص بات یہ ہے کہ لیاری ندی کے سامنے واقع اس مسجد کی بناوٹ کشتی جیسی ہے۔
خوبصورتی کا ایک نمونہ جو کہ کراچی والوں کو بہت کم دیکھنے کو ملتا ہے، یہ نمونہ مشہور علاقے جہاں کبھی گینگ وار کا راج ہوا کرتا تھا، میں ہے۔
اس مسجد کے ایک طرف سے ٹریفک آ رہا ہوتا ہے تو دوسری جانب سے ٹریفک جا رہا ہوتا ہے۔ کشتی والی مسجد کے نام سے مشہور یہ مسجد کراچی کے منفرد مذہبی مقامات میں سے ایک ہے۔
سڑک کے بیچ میں مسجد:
جنوبی ممبئی میں واقع یہ مسجد 1958 میں تعمیر کی گئی تھی جو بھارت میں مذہبی ہم آہنگی کے طور پر مشہور ہے لیکن آج اس مسجد اور اس کی انتظامیہ بھی غیر محفوظ ہے۔
اس مسجد کو گول مسجد کہا جاتا ہے جو کہ بھارت کی اگرچہ چھوٹی مساجد میں سے ایک ہے مگر اپنی انفرادیت اور بناوٹ کی وجہ سے سب میں توجہ حاصل کر رہی ہے۔
مسجد کے امام اسرائیل احمد ہیں جو کہ کئی سال سے اس مسجد کی دیکھ بھال کر رہے ہیں۔ ساتھ ہی ساتھ ہر آنے والے کو اس مسجد کی تاریخ کے بارے میں بھی بتاتے ہیں۔
مین روڈ پر واقع مسجد:
بھارتی ریاست مدھیا پردیش کے ساگر ضلع میں ایک ایسی مسجد واقع ہے جو کہ روڈ کے بیچ میں واقع ہے، اسے ایسے سمجھیں کہ جیسے چورنگی کی جگہ یہ مسجد موجود ہو اور چار راستے بھی اس مسجد کے اردگرد موجود ہوں۔
ساگر ضلع کے کترہ بازار میں واقع جامع مسجد اپنی نوعیت کی دلچسپ اور منفرد مسجد ہے جس میں نمازی دور ہی سے مسجد کو پہچان کر نماز پڑھنے دوڑے چلے آتے ہیں۔
بازار کے ساتھ موجود اس مسجد میں جمعہ سمیت 5 وقت کی نماز ہوتی ہے، سڑک کے بیچ میں موجود مسجد کے خلاف انتہا پسندوں کی جانب سے آواز اٹھائی گئی تاہم مسجد کی خاطر اب بھی سڑک کے آس پاس کا علاقہ کشادہ ہے اور کسی قسم کی پریشانی پیش نہیں آتی۔ جبکہ مسجد کی جانب آتے روڈ بھی موڑ دیے گئے ہیں۔