قرآن اللہ کی کتاب ہے اور مسلمانوں کے لیے ہدایت کا سرچشمہ ہے۔ ہر مسلمان کی خواہش ہوتی ہے کہ وہ قرآن حفظ کرے، اللہ کے کلام سے اپنے سینے کو روشن کرے۔ لیکن یہ سعادت بھی خوش نصیبوں کو ہی حاصل ہوتی ہے۔ ہمارے ہاں جہاں دنیاوی پڑھائی کو ترجیح دی جاتی ہے وہیں لاکھوں مسلمان ایسے بھی ہیں جو ہر حال میں قرآن حفظ کرلیتے ہیں۔
اگر ہم غزہ کے لوگوں کی بات کریں تو ان کی اکثریت قرآن حفظ کر رہی ہے۔ جس کی وجہ یہ ہے کہ وہاں اسرائیل کی جانب سے جس قدر نامصائب حالات پیدا کر دیئے گئے ہیں ان میں قرآن اور اللہ کی مدد ہی سب سے بڑا ہتھیار ہے۔
غزہ سے اس خاندان کی تصویر سوشل میڈیا پر خوب شیئر کی جا رہی ہے اور بتایا جا رہا ہے کہ یہ وہ خاندان ہے جس میں ہر کوئی حافظِ قرآن ہے۔ خواتین ہوں یا بچے، مرد حضرات ہوں یا نوجوان یہ سب ہی حافظِ قرآن ہیں۔ ان کے مطابق غزہ کے حالات چونکہ خراب ہیں، کبھی بھی کہیں بھی بمباری ہو جاتی ہے لہٰذا انہوں نے قرآن کو حفظ کرنا سب سے اہم سمجھا تاکہ مرنے سے قبل سینوں کو قرآن کی روشنی سے بھرلیں۔