پاکستان مسلم لیگ ن کے رہنما انجم عقیل کو سڑک پر گاڑی دھونے اور پانی ضائع کرنے پر نوٹس جاری، ساتھ ہی بھاری جرمانہ بھی عائد کردیا گیا۔
تفصیلات کے مطابق لیگی رہنما انجم عقیل خان کو اسپیشل مجسٹریٹ کی عدالت میں طلب کرلیا گیا۔ کیپیٹل ڈیولپمنٹ اتھارٹی (سی ڈی اے) کی جانب سے انجم عقیل خان پر 35 ہزار روپے جرمانہ عائد کردیا گیا۔
لیگی رہنما کو جاری کردہ نوٹس میں کہا گیا کہ عقیل انجم خان کے ڈرائیور نے چالان کرنے پر واٹر سپلائی کے ملازم پر رشوت کا الزام لگایا۔ انجم عقیل کے ڈرائیور نے سی ڈی اے اہلکار کی ویڈیو بھی بنائی۔
اس حوالے سے انجم عقیل کو 23 جون کو اسپیشل مجسٹریٹ کی عدالت میں طلب کرلیا گیا۔ انجم عقیل خان اور ان کے ڈرائیور کو پیش ہو کر صفائی دینے کا کہا گیا ہے۔