انڈین سرحد پر تعینات پاکستانی رینجرز نے منشیات اور اسلحے کے چھ سمگلروں کو گرفتار کیا ہے جن کا تعلق انڈیا سے بتایا جا رہا ہے۔
منگل کو پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ’پاکستانی رینجرز نے 29 سے 03 اگست کے درمیان چھ انڈین شہریوں کو پکڑا ہے جو منشیات اور اسلحہ پاکستان سمگل کرنے کی کوشش کر رہے تھے۔‘بیان میں کہا گیا کہ ’یہ حیرانگی کی بات ہے کہ انڈین بارڈر فورس (بی ایس ایف) کی بھاری سکیورٹی کے باوجود ان سمگلروں نے سرحد پار کر لی۔ اس سے ظاہر ہوتا ہے کہ بی ایس ایف منشیات اور اسلحے کی سمگلنگ میں ملوث ہے۔ مزید حیرانگی اس بات پر ہے کہ بی ایس ایف نے اپنے چھ لاپتہ شہریوں کی رپورٹ بھی نہیں کی۔‘آئی ایس پی آر کے مطابق چار سمگلروں کا تعلق فیروزپور سے ہے اور ان کے نام گرمیت سنگھ ولد گلدیپ سنگھ، شندر سنگھ ولد بھوڑا سنگھ، جوگندر سنگھ ولد ٹھاکر سنگھ اور وشال ولد جگا ہیں، جبکہ رتن پال سنگھ ولد مہیندر سنگھ جالندھر اور گرویندر سنگھ ولد مختیار سنگھ لدھیانہ سے ہے۔مزید کہا گیا کہ ’پاکستان میں غیرقانونی طور پر داخل ہونے پر ان سمگلروں کے خلاف قانون کے مطابق کارروائی کی جائے گی۔ پاکستانی سکیورٹی فورسز نگرانی جاری رکھیں گی اور امید ہے کہ انڈین بی ایس ایف پیشہ ورانہ طریقے سے کام کرے گی اور اپنے علاقے میں کام کرنے والے سمگلروں سے تعلق نہیں رکھے گی۔‘