اسلام آباد۔29فروری (اے پی پی):پیپلز پارٹی کی نو منتخب رکن قومی اسمبلی ناز بلوچ نے کہا ہے کہ ملک کو جمہوریت کی ضرورت ہے اور تمام سیاسی جماعتوں کو اس کیلئے کردار ادا کرنا چاہئے۔ جمعرات کو پارلیمنٹ ہاؤس میں میڈیا سے گفتگو کرتے ہوئے انہوں نے کہا کہ ملک کو جمہوریت کی ضرورت ہے انتقام کی ضرورت نہیں ہے۔اس ملک کو آگے لے جانا ہے۔ انہوں نے کہا کہ آگے بڑھنے کے لئے تمام سیاست دانوں کو اپنا کردار ادا کرنا چاہئے۔ پاکستان نے انتقام کی سیاست میں بڑا نقصان اٹھایا۔ تہذیب و تمدن کے دائرے میں رہ کر ہم نے اس پارلیمنٹ کا تقدس بحال کرنا ہے اور ملک کو آگے بڑھانا ہے۔ انہوں نے کہا کہ پیپلز پارٹی پارلینٹرین نے جمہوریت کی بقا کے لئے کافی قربانیاں دی ہیں۔