کراچی۔ 24 مارچ (اے پی پی):کراچی انتظامیہ کی جانب سے ماہ رمضان المبار ک کے موقع پر گراں فروشوں کے خلاف مہم جاری ہے۔اتوار کو جاری کردہ اعلامیہ کے مطابق کمشنرکراچی محمد سلیم راجپوت نے مہم کو موثر بنانے کی ہدایت کی ہے۔
کمشنر کراچی نے ہدایت کی ہے کہ ہر علاقہ میں مجسٹریٹس قیمتیں چیک کریں اور سرکاری نرخ کا نفاذ یقینی بنائیں ۔انہوں نے بیوروآف سپلائی اور دیگر متعلقہ افسران کو اپنی ذمہ داری پوری کرنے کی بھی ہدایت کی۔گزشتہ روز96گراں فروشوں پر 7لاکھ 80ہزار روپے سے زائد جرمانہ عائد کیا گیا،مجموعی طور پر کراچی انتظامیہ کے افسران نے گزشتہ روز382مقامات پر قیمتیں چیک کیں ۔ضلع جنوبی میں 38گراں فروشوں پر 3لاکھ 93ہزار 500روپے جرمانہ عائد کیا گیا، شرقی ضلع میں 13گراں فروشوں پر 98ہزار روپے، غربی میں 11گراں فروشوں پر 58ہزار روپے سے زائد جرمانہ عائد کیا، وسطی میں 14گراں فروشوں پر 96ہزارروپے، ملیر میں 6گراں فروشوں پر 29ہزار روپے، کورنگی میں 8گراں فروشوں پر 65ہزار جبکہ کیماڑی میں 6گراں فروشوں پر 40ہزار روپے جرمانہ عائد کیاگیا۔