اترپردیش کے ہمیرپور ضلع میں ایک دلدوز واقعے نے سب کو جھنجھوڑ کر رکھ دیا جب 24 سالہ خاتون نے شوہر کی گٹکا کھانے کی عادت سے تنگ آ کر خودکشی کر لی۔ یہ دل دہلا دینے والا سانحہ کروا چوتھ کی رات پیش آیا، جب ساریکا نے پوجا کے بعد خود کو پھانسی لگا لی۔
رپورٹس کے مطابق، ساریکا اور سلبھ کی پسند کی شادی 2021 میں ہوئی تھی، مگر شوہر کی گٹکا کھانے کی لت شادی شدہ زندگی پر سایہ بن کر چھا گئی تھی۔ کروا چوتھ کی رات جب ساریکا نے شوہر سے ایک بار پھر گٹکا چھوڑنے کی درخواست کی تو بات بگڑ گئی اور جھگڑا شدت اختیار کر گیا۔ چاند کے نظر آتے ہی ساریکا کی مایوسی حد سے بڑھ گئی، اور وہ کمرے میں جا کر زندگی سے ہاتھ دھو بیٹھی۔
پولیس نے اطلاع ملنے پر لاش کو پوسٹ مارٹم کے لیے بھیج دیا ہے جبکہ تحقیقات کا عمل جاری ہے۔ ساریکا کی موت نے اس دردناک حقیقت کو پھر سے اجاگر کیا کہ گٹکا اور تمباکو کی لت کس طرح جان لیوا نتائج کا باعث بن سکتی ہے۔ سلبھ کی عادت نہ صرف ان کے رشتے بلکہ زندگی کی خوشیوں کو بھی نگل گئی۔
یہ سانحہ ان سب کے لیے ایک تلخ سبق ہے جو اس خطرناک عادت میں ملوث ہیں۔