اسٹیٹ بینک آف پاکستان نے جشنِ معرکۂ حق اور یومِ آزادی کے موقع پر مسلح افواج کی بہادری کو خراجِ تحسین پیش کرنے کے لیے 75 روپے کا یادگاری سکّہ جاری کر دیا۔
وفاقی حکومت کی ہدایت پر جاری یہ سکّہ نکل اور پیتل سے تیار کیا گیا ہے جس میں 79 فیصد تانبہ، 20 فیصد زنک اور ایک فیصد نکل شامل ہے۔ سکّے کا قطر 30 ملی میٹر اور وزن 13.5 گرام ہے۔
سکّے کے سامنے والے رخ پر وسط میں بڑھتا ہوا ہلال اور پانچ نوکوں کا ابھرتا ہوا ستارہ شمال مغرب کی سمت میں بنا ہے۔ اوپر کے حصے میں اسلامی جمہوریہ پاکستان کے الفاظ کندہ ہیں جبکہ چاند کے نیچے اور گندم کی بالیوں کے اوپر سنِ اجرا 2025 درج ہے۔ ستارے اور ہلال کے دائیں جانب 75 اور بائیں جانب روپیہ لکھا گیا ہے۔
سکّے کے پچھلی جانب وسط میں معرکۂ حق اور 2025 کے الفاظ درج ہے جبکہ اوپر کے کنارے پر پاکستان ہمیشہ زندہ باد لکھا گیا ہے۔ دونوں اطراف پر دو لڑاکا طیارے، بحری جہاز اور ملٹی پل راکٹ لانچر سسٹم کی تصاویر ابھری ہوئی ہیں۔
یہ یادگاری سکّہ اسٹیٹ بینک بینکنگ سروسز کارپوریشن کے فیلڈ دفاتر کے ایکسچینج کاؤنٹرز پر 15 اگست 2025 سے دستیاب ہوگا۔