خیبر پختونخوا کی خالی سینیٹ نشست پر ہونے والی ضمنی انتخابات میں تین امیدواروں کے درمیان مقابلہ تھا جس میں حکومتی حمایت یافتہ آزاد امیدوار مشال یوسفزئی 86 ووٹ لیکر کامیاب قرار پائی۔
مد مقابل اپوزیشن امیدوارمہتاب ظفر نے 53 ووٹ حاصل کیے جبکہ پی ٹی آئی کی ناراض آزاد امیدوار صائمہ خالد نے ایک ووٹ حاصل کیا۔ ریٹرننگ افسر نے مشال یوسفزئی کی کامیابی کافارم 58 جاری کردیا۔ مذکورہ نشست پر پی ٹی آئی کی حمایت یافتہ آزاد امیدوار مشعال یوسفزئی اور اپوزیشن کے مہتاب ظفر اور صائمہ خالد کے درمیان مقابلہ تھا۔
سینیٹ الیکشن کے لیے اپوزیشن نے آزاد امیدوار مہتاب ظفر کو متفقہ امیدوار نامزد کیا تھا جبکہ جے یو آئی (ف) کی امیدوار شازیہ اور ( ن) لیگ کی ثوبیہ شاہد دستبردار ہوگئی تھیں۔
پولنگ سے قبل وزیراعلیٰ علی امین کی اپوزیشن لیڈر عباداللہ سے ملاقات ہوئی جس میں اپوزیشن لیڈر نے امیدوار دستبردار کرانے سے معذرت کی۔
آج ہونے والے سینیٹ کے ضمنی انتخاب میں تین ووٹ مسترد ہوئے یہ وہ ووٹ تھے جو حکومتی ممبران نے باہر نکلوائے تھے جسے الیکشن کمیشن کے عملے نے مسترد کردیا، خیبر پختونخوا کے کل 145 ممبران میں سے 143 نے ووٹ کاسٹ جبکہ 2 ممبران غیر حاضر رہے، غیر حاضر ممبران میں ایک حکومتی اور ایک اپوزیشن ممبر شامل تھے۔