سپریم کورٹ بار ایسوسی ایشن کے سالانہ انتخابات کل ہوں گے جن میں وکلا برادری کے دو بڑے گروپوں کے درمیان کانٹے دار مقابلے کی توقع کی جا رہی ہے۔
تفصیلات کے مطابق صدر کے عہدے کے لیے ہارون الرشید اور توفیق آصف کے درمیان ون ٹو ون مقابلہ ہوگا جبکہ سیکرٹری کے لیے میاں عرفان اکرم اور ملک زاہد اسلم اعوان آمنے سامنے ہوں گے۔
انتخابات میں ملک بھر سے 4 ہزار 379 رجسٹرڈ ووٹرز اپنا حقِ رائے دہی استعمال کریں گے۔ پولنگ صبح سے شام تک جاری رہے گی جب کہ ووٹوں کی گنتی مکمل ہونے کے بعد نتائج کا اعلان اُسی روز کیا جائے گا۔
وکلا حلقوں کے مطابق اس سال کے انتخابات میں دونوں گروپوں کے درمیان سخت مقابلے کی توقع ہے اور مختلف شہروں سے وکلا قافلوں کی صورت میں اسلام آباد پہنچ رہے ہیں تاکہ اپنے امیدواروں کی حمایت کر سکیں۔