"کئی لوگ مجھ سے اووریئن کینسر کی علامات کے بارے میں پوچھتے ہیں۔ یہ بیماری بڑی خاموشی سے جسم میں پھیلتی ہے، اسی لیے زیادہ تر مریض اسے وقت پر نہیں پہچان پاتے۔ صرف تقریباً 20 فیصد کیسز ایسے ہوتے ہیں جن میں بروقت تشخیص ممکن ہو پاتی ہے۔ اس کی علامات اتنی ہلکی ہوتی ہیں کہ اکثر خواتین انہیں معمولی سمجھ کر نظرانداز کر دیتی ہیں۔ ان میں پیٹ کا پھول جانا، بھوک میں کمی، وزن میں اچانک تبدیلی، بار بار پیشاب آنا اور غیر معمولی خون بہنا شامل ہیں۔ میں خود بھی سفر کے دوران یہ علامات محسوس کر رہی تھی لیکن انہیں اہمیت نہیں دی۔ بعد میں پاکستان واپس آ کر ٹیسٹ کروایا تو پتہ چلا کہ مجھے گریڈ 3 اووریئن کینسر ہے۔ میں سب خواتین سے کہوں گی کہ اگر جسم میں کوئی عجیب سی تبدیلی محسوس ہو تو فوراً ٹیسٹ کروائیں، خاص طور پر CA-125 ٹیسٹ یا پیلوک الٹراساؤنڈ, یہ آسان اور سستے ٹیسٹ آپ کی زندگی بچا سکتے ہیں۔"
یہ پیغام اداکارہ اور ڈائریکٹر انجلین ملک نے اپنے مداحوں سے شیئر کیا، جو ان دنوں کینسر کے علاج سے گزر رہی ہیں۔
انجلین ملک پاکستان کی معروف فنکارہ ہیں جنہوں نے "میری آواز سنو"، "راج ہنسنی"، "کتنی گرہیں باقی ہیں" اور "مجھے جینے دو" جیسے مشہور ڈراموں سے شہرت حاصل کی۔ وہ آج کل نہ صرف اپنی بیماری سے لڑ رہی ہیں بلکہ خواتین کو صحت کے بارے میں شعور دینے کی کوشش بھی کر رہی ہیں۔
انجلین کا کہنا ہے کہ کینسر ہمیشہ شور نہیں مچاتا بعض اوقات یہ خاموشی سے بڑھتا ہے، اور جب پتہ چلتا ہے تو بہت دیر ہو چکی ہوتی ہے۔ وہ چاہتی ہیں کہ لوگ اپنے جسم کی چھوٹی تبدیلیوں کو بھی سنجیدگی سے لیں اور وقت ضائع کیے بغیر چیک اپ کروائیں۔
ان کے اس پیغام کے بعد سوشل میڈیا پر مداحوں نے ان کے لیے دعاؤں اور حوصلے کے پیغامات بھیجے۔ بہت سے صارفین نے لکھا کہ انجلین ملک نے اپنی ہمت اور کھلے انداز میں بات کرنے سے کینسر کے بارے میں لوگوں کی سوچ بدل دی ہے۔ اب وہ صرف ایک فنکارہ نہیں بلکہ آگاہی اور امید کی علامت بن چکی ہیں۔