پاکستان اور جنوبی افریقہ کے درمیان جاری دوسرے ٹیسٹ میچ میں میزبان ٹیم کی بیٹنگ جاری ہے۔
بدھ کو پنڈی کرکٹ سٹیڈیم میں پاکستان نے چار وکٹوں کے نقصان پر 73 رنز بنائے ہیں۔
پاکستان کی جانب سے بابر اعظم اور محمد رضوان کریز پر موجود ہیں۔
اس سے قبل پاکستان کے 333 رنز کے جواب میں جنوبی افریقہ اپنی پہلی اننگز میں 404 رنز بنا کر آؤٹ ہو گئی تھی۔
پنڈی ٹیسٹ کے تیسرے دن کے کھیل کا آغاز جنوبی افریقہ نے 185 رنز اور چار کھلاڑی آؤٹ سے کیا تھا۔
جنوبی افریقہ کی جانب سے کائل ویرینے 10، ٹرسٹن سٹبس 76، سائمن ہارمر دو، مارکو جینسن 12، کیشیو مہاراج 30 اور کاگیسو ربادا 71 رنز بنا کر آؤٹ ہوئے جبکہ سینوران متھوسامی 89 رنز بنا کر ناٹ آؤٹ رہے۔
پاکستان کی جانب سے ڈبیو میچ کھیلنے والے سپن بولر آصف آفریدی نے چھ وکٹیں حاصل کی ہیں۔
آصف آفریدی ٹیسٹ کرکٹ ڈیبیو میچ میں چھ وکٹیں حاصل کرنے والے معمر ترین کھلاڑی بن گئے ہیں۔ یہ اعزاز انہوں نے 38 برس کی عمر میں حاصل کیا ہے، اور اس کے ساتھ انہوں نے ٹیسٹ کرکٹ کا 92 سال کا ریکارڈ بھی توڑا ہے۔
اس سے قبل یہ اعزاز انگلینڈ کے سپنر چارلز میریٹ کے پاس تھا جنہوں نے 37 سال 332 دن کی عمر میں ڈیبیو ٹیسٹ میں پانچ وکٹیں حاصل کی تھیں۔
ان کے علاوہ نعمان علی نے دو جبکہ شاہین آفریدی اور ساجد خان نے ایک ایک وکٹ حاصل کی۔
دوسرے روز کا کھیل
منگل کو جنوبی افریقہ کی جانب سے ٹرسٹن سٹبز 68 اور کائل ویرینے 10 رنز کے ساتھ ناٹ آؤٹ رہے تھے۔
اس سے سے قبل پاکستان نے 333 رنز بنائے تھے، اس کے جواب میں جنوبی افریقہ نے اپنی پہلی اننگز کا آغاز کیا تو 22 کے مجموعی سکور پر ریان ریکلٹن انفرادی 14 رنز بناکر شاہین آفریدی کا شکار بنے۔
اس کے بعد ٹونی ڈی زورزی 55، کپتان ایڈن مارکرم 32 اور ڈیوالڈ بریوس بغیر کوئی رن بنائے آؤٹ ہوئے۔
پاکستان کی جانب سے ڈیبیو کرنے والے آصف آفریدی نے دو جبکہ شاہین آفریدی اور ساجد خان نے ایک ایک وکٹ حاصل کی۔
اس سے قبل دوسرے روز کے کھیل کا آغاز پاکستان نے اننگز کا آغاز 259 رنز پانچ کھلاڑی آؤٹ سے کیا تھا، اس وقت سعود شکیل اور آغا سلمان بالترتیب 42 اور 10 رنز کے ساتھ کریز پرموجود تھے۔
پاکستان کی جانب سے ڈبیو کرنے والے سپنر آصف آفریدی نے چھ وکٹیں حاصل کی (فوٹو: اے ایف پی)
دونوں بلے باز اننگز کو آگے بڑھاتے رہے، سعود شکیل نے نصف سینچری بھی مکمل کی تاہم سلمان آغا 45 رنز پر پویلین لوٹ گئے، اس کے تھوڑی دیر بعد سعود شکیل بھی 66 رنز پر آؤٹ ہو گئے۔
ان کے بعد آنے والوں میں سے کوئی بھی بلے باز ٹک نہ سکا۔ شاہین آفریدی صفر، ساجد خان چار اور آصف آفریدی پانچ رنز ہی بنا پائے، ان کو مہاراج نے پویلین کی راہ دکھائی جبکہ نعمان علی چھ رنز بنا کر ناٹ آؤٹ رہے۔جنوبی افریقہ کی جانب سے کیشوو مہاراج نے سات وکٹیں لیں جبکہ سائمن ہارمر نے ایک اور ربادا نے ایک وکٹ لی۔پہلے روز کا کھیل
پیر کو پاکستان نے ٹاس جیت کر بیٹنگ کا فیصلہ کیا تھا اور دن کے اختتام تک پاکستان نے 5 وکٹوں کے نقصان پر 259 رنز بنائے تھے۔
پاکستان کی جانب سے محتاط آغاز کے باوجود امام الحق زیادہ دیر نہ ٹھہر سکے اور 17 کے سکور پر بولڈ ہو گئے، ان کے بعد آنے والے شان مسعود اور عبداللہ شفیق ذمہ دارانہ طور پر آگے بڑھتے رہے اور نصف سینچریز کرنے میں کامیاب رہے تاہم یہ پارٹنرشپ اس وقت ٹوٹی جب عبداللہ شفیق 57 رنز پر آؤٹ ہوئے۔
ان کے بعد آنے والے بابر اعظم صرف 16 رنز ہی بنا پائے جبکہ ان کے بعد سعود شکیل بیٹنگ کے لیے آئے۔
جنوبی افریقہ کی جانب سے سینوران متھوسامی 89 رنز بنا کر ناٹ آؤٹ رہے (فوٹو: اے ایف پی)
پاکستان کے کپتان شان مسعود اچھی فارم میں نظر آئے اور سینچری بنانے کے قریب ہی تھے کہ کیشو مہاراج کی گیند پر 87 رنز بنا کر کیچ آؤٹ ہو گئے۔
شان مسعود کے بعد محمد رضوان نے کریز سنبھالی لیکن وہ زیادہ دیر نہ ٹھہر سکے اور 19 رنز پر کگیسو ربادا کے ہاتھوں آؤٹ ہو گئے تھے۔
جنوبی افریقہ کی جانب سے سائمن ہارمر اور کیشو مہاراج نے دو، دو جبکہ کگیسو ربادا نے ایک وکٹ حاصل کی تھی۔
اس سے قبل لاہور کے قذافی سٹیڈیم میں ہونے والے پہلے ٹیسٹ میں پاکستان نے جنوبی افریقہ کو 93 رنز سے شکست دے کر سیریز میں ایک صفر کی برتری حاصل کی تھی۔
پاکستانی پلیئنگ الیون
پاکستان کی جانب سے میدان میں اترنے والی ٹیم میں شان مسعود (کپتان)، عبداللہ شفیق، امام الحق، بابر اعظم، سعود شکیل، محمد رضوان، سلمان علی آغا، نعمان علی، ساجد خان، آصف آفریدی اور شاہین شاہ آفریدی شامل ہیں۔
جنوبی افریقہ کی پلیئنگ الیون
مہمان ٹیم ایڈم مارکرم (کپتان)، ریان رکلٹن، ٹرسٹن سٹبس، ٹونی ڈی زورزی، ڈیوالڈ بریوس، کائل ویرینے، سینوران متھوسوامے، مارکو جینسن، سمن ہارمر، کیشو مہاراج اور کگیسو ربادا پر مشتمل ہے۔