امریکی صدر دفتر وائٹ ہاؤس نے صحافیوں کے داخلے کے حوالے سے نئی پالیسی نافذ کر دی ہے جس کے تحت اب کسی بھی صحافی کو پریس سیکرٹری یا اعلیٰ حکام کے دفاتر میں بغیر اجازت داخلے کی اجازت نہیں ہوگی۔
غیر ملکی میڈیا رپورٹس کے مطابق نئی پالیسی کے تحت اپر پریس روم میں داخلہ صرف پیشگی اپائنٹمنٹ کے ذریعے ممکن ہوگا۔ وائٹ ہاؤس کے جاری کردہ اعلامیے میں کہا گیا ہے کہ یہ فیصلہ فوری طور پر نافذ العمل ہے اور اس کا مقصد حساس معلومات کے تحفظ کو یقینی بنانا ہے۔
یہ اقدام ایسے وقت میں کیا گیا ہے جب گزشتہ ماہ پینٹاگون میں بھی اسی نوعیت کی پابندیاں عائد کی گئی تھیں جس پر امریکی صحافتی تنظیموں نے آزادیٔ صحافت پر خدشات کا اظہار کیا تھا۔
ماہرین کے مطابق وائٹ ہاؤس کی نئی پالیسی سے امریکا میں شفافیت اور صحافیوں کی رسائی پر بحث چھڑ گئی ہے۔ ناقدین کا کہنا ہے کہ حکومت کے یہ اقدامات میڈیا پر دباؤ کے مترادف ہیں جبکہ انتظامیہ کا مؤقف ہے کہ یہ سیکیورٹی کے بہتر انتظامات کے لیے ضروری قدم ہے۔
اعلامیے کے مطابق یہ پالیسی تمام میڈیا اداروں پر یکساں طور پر لاگو ہوگی اور کسی کو بھی خصوصی رعایت نہیں دی جائے گی۔