حکومت نے ایک بار پھر پیٹرولیم مصنوعات کی قیمتوں میں اضافہ کرتے ہوئے عوام پر مزید بوجھ ڈال دیا ہے۔ خزانہ ڈویژن کی جانب سے جاری نوٹیفکیشن میں بتایا گیا کہ اوگرا اور متعلقہ حکام کی تجاویز کی روشنی میں ایندھن کی قیمتوں میں ردوبدل کیا گیا ہے۔ نئی قیمتیں یکم نومبر 2025 سے نافذ ہوں گی اور آئندہ پندرہ دنوں تک لاگو رہیں گی۔ اعلان کے مطابق پیٹرول کی قیمت میں دو روپے 43 پیسے کا اضافہ کر دیا گیا ہے، جس کے بعد فی لیٹر نرخ بڑھ کر 265 روپے 45 پیسے تک پہنچ گئے ہیں، جبکہ اس سے قبل قیمت 263 روپے دو پیسے تھی۔ اسی طرح ہائی اسپیڈ ڈیزل بھی مہنگا کر دیا گیا ہے اور اس کی قیمت میں تین روپے دو پیسے کا اضافہ کیا گیا ہے، جس سے فی لیٹر قیمت 275 روپے 42 پیسے سے بڑھ کر 278 روپے 44 پیسے ہو گئی ہے۔