وزیرِ اعلیٰ خیبر پختونخوا سہیل آفریدی نے باجوڑ میں تحریک انصاف کے ایم پی اے انور زیب خان کی رہائشگاہ پر بم دھماکے کی شدید مذمت کرتے ہوئے پولیس اور متعلقہ اداروں کو فوری تحقیقات کی ہدایت کردی۔
وزیرِ اعلیٰ نے کہا کہ امن و امان قائم رکھنا حکومت کی اولین ترجیح ہے، اس قسم کے بزدلانہ حملے ہمارے حوصلے پست نہیں کر سکتے، وزیرِ اعلیٰ نے زخمی شخص کو فوری اور بہترین طبی سہولیات فراہم کرنے کی ہدایت بھی کی۔
وزیرِ اعلیٰ نے آئی جی پولیس سے واقعے کی فوری رپورٹ طلب کرلی۔
یاد رہے کہ باجوڑ کےتحصیل خار کے علاقہ راغگان میں تحریک انصاف کے سابق صوبائی وزیر اور ایم پی اے انور زیب خان کی رہائشگاہ پر دھماکے میں ایک شخص زخمی ہوا، جس کی شناخت محمد زیر کے نام سے ہوئی ہے۔
دھماکے کے وقت ایم پی اے انور زیب گھر پر موجود نہیں تھے۔ ممبر صوبائی اسمبلی انور زیب خان نے کہا کہ یہ ڈورن حملہ تھا۔ پولیس نے واقعہ کی تحقیقات شروع کردی ہے۔