اسلام آباد ہائیکورٹ میں وفاقی دارالحکومت کے تعلیمی اداروں میں منشیات کے خاتمے سے متعلق کیس کی سماعت ہوئی۔ کیس کی سماعت جسٹس راجہ انعام امین منہاس نے کی۔
سماعت کے دوران اسلام آباد پولیس، اینٹی نارکوٹکس فورس (اے این ایف) اور پرائیویٹ سکول ریگولیٹری اتھارٹی کی جانب سے عمل درآمد رپورٹس عدالت میں جمع کرائی گئیں۔ عدالتی حکم پر منشیات کے خاتمے کے لیے آئی جی اسلام آباد کی سربراہی میں اسٹیک ہولڈرز کی دو اہم میٹنگز منعقد کی گئیں۔
آئی جی آفس کے ڈائریکٹر لیگل طاہر کاظم نے عدالت کو آگاہ کیا کہ مختلف اداروں کے مابین رابطہ اور تعاون کو مؤثر بنانے کے لیے اقدامات کیے جا رہے ہیں۔
اس موقع پر جسٹس انعام امین منہاس نے ریمارکس دیتے ہوئے کہا کہ حکومت کو منشیات کے خاتمے کے لیے خود جوائنٹ ٹاسک فورس تشکیل دینی چاہیے۔جسٹس انعام امین منہاس نے کہا کہ عدالت کا مقصد صرف میٹنگز بلوانا نہیں بلکہ عملی اقدامات دیکھنا ہے، اور منشیات کے خاتمے کے لیے ٹھوس عمل درآمد ناگزیر ہے۔
اے این ایف کے پراسیکیوٹر رانا ذوالفقار نے عدالت کو بتایا کہ منشیات کے خاتمے کے لیے ہر پرائیویٹ تعلیمی ادارے میں فوکل پرسن تعینات کر دیا گیا ہے، جبکہ اس حوالے سے ہر ماہ باقاعدہ میٹنگز بھی منعقد کی جائیں گی۔
پرائیویٹ اسکول ریگولیٹری اتھارٹی (پیرا) کے حکام نے عدالت کو بتایا کہ تعلیمی اداروں میں منشیات کے خلاف آگاہی مہم چلائی گئی ہے، جبکہ 9 دسمبر کو 100 اسکولوں کے نمائندگان پر مشتمل ٹیم کو بلا کر آگاہی سیشنز منعقد کیے گئے۔
عدالت کو آگاہ کیا گیا کہ ہر اسکول میں فوکل پرسن پر مشتمل کمیٹیاں تشکیل دی جا چکی ہیں، جبکہ پیمرا کے ذریعے منشیات کے خاتمے سے متعلق آگاہی مہم چینلز پر چلانے کی یقین دہانی بھی کروائی گئی۔
تاہم جسٹس انعام امین منہاس نے ریمارکس دیے کہ انہیں تاحال کسی چینل پر ایسی آگاہی مہم نشر ہوتی دکھائی نہیں دی۔ عدالت نے آئندہ سماعت پر پیمرا کے متعلقہ افسر کو طلب کرتے ہوئے منشیات کے خاتمے کی مہم پر عمل درآمد رپورٹ پیش کرنے کی ہدایت جاری کی۔
سماعت کے دوران ڈی ایس پی لیگل ساجد چیمہ عدالت میں پیش ہوئے۔ عدالت نے کیس کی مزید سماعت 27 جنوری تک ملتوی کردی۔