صوبائی دارالحکومت پشاور میں وزیراعلیٰ خیبرپختونخوا سہیل آفریدی کی زیرِ صدارت خیبرپختونخوا کابینہ کا اہم اجلاس آج منعقد ہوگا، جس کے لیے 29 نکاتی ایجنڈا تیار کر لیا گیا ہے۔
کابینہ اجلاس آج دوپہر 2 بجے سول سیکرٹریٹ پشاور میں ہوگا جس میں کابینہ اراکین کے علاوہ متعلقہ محکموں کے سیکرٹریز بھی شرکت کریں گے۔ اجلاس کے لیے تمام متعلقہ حکام کو باضابطہ مراسلے ارسال کر دیے گئے ہیں۔
جاری اعلامیے کے مطابق اجلاس میں خیبرپختونخوا سیف سٹی پراجیکٹ کے لیے 3 ارب 82 کروڑ 50 لاکھ روپے کی سپلیمنٹری گرانٹ کی منظوری ایجنڈے میں شامل ہے۔ اس کے علاوہ ضم شدہ اضلاع کے طلبہ کے لیے میڈیکل کالجز میں مختص کوٹے کی منظوری بھی زیرِ غور آئے گی۔
اجلاس میں اسکول لیڈرز کو دوبارہ عارضی بنیادوں پر بھرتی کرنے کی تجویز پر بھی غور کیا جائے گا۔ اہم انتظامی اور تعلیمی فیصلوں کے باعث اس کابینہ اجلاس کو صوبے کی پالیسی سازی کے حوالے سے نہایت اہم قرار دیا جا رہا ہے۔