کراچی کے مصروف علاقے ایم اے جناح روڈ پر واقع گل پلازہ میں لگنے والی خوفناک آگ 33 گھنٹے بعد مکمل طور پر بجھا دی گئی۔ ریسکیو حکام کے مطابق سرچ آپریشن کے دوران مزید 20 افراد کی لاشیں نکال لی گئیں، جس کے بعد جاں بحق افراد کی تعداد 26 ہوگئی ہے، جبکہ 22 افراد زخمی ہوئے ہیں۔

کراچی پولیس چیف آزاد خان نے سانحہ گل پلازہ کی ابتدائی تحقیقات میں تخریب کاری کے امکان کو مسترد کردیا۔ گل پلازہ کے دورے کے موقع پر میڈیا سے گفتگو میں ایڈیشنل آئی جی کراچی آزاد خان نے کہا کہ گل پلازہ واقعے کی ابتدائی تحقیقات کے مطابق تخریب کاری کے کوئی شواہد نہیں ملے۔

واضح رہے کہ گل پلازہ میں آگ ہفتے کی رات سوا 10 بجے کے قریب گراؤنڈ فلور پر لگی، جو دیکھتے ہی دیکھتے تیسری منزل تک پھیل گئی۔ شدید آتشزدگی کے باعث عمارت گر کر ملبے کا ڈھیر بن گئی۔

فائر بریگیڈ کے عملے نے 33 گھنٹے کی طویل جدوجہد کے بعد آگ پر مکمل طور پر قابو پایا، جس کے بعد کولنگ کا عمل جاری ہے۔ حکام کا کہنا ہے کہ آگ بجھنے کے بعد فائر فائٹرز پلازہ کے اندر داخل ہوئے اور جلی ہوئی دکانوں میں محدود پیمانے پر سرچ آپریشن کیا گیا۔ اس دوران ایک بچے سمیت 3 افراد کے اعضا ملے، جنہیں سول اسپتال کے ٹراما سینٹر منتقل کر دیا گیا۔

ریسکیو حکام کے مطابق تیسری منزل پر پھنسے ایک شخص کی موجودگی کے امکان پر خصوصی ریسکیو آپریشن بھی کیا گیا، تاہم وہاں کوئی شخص نہ مل سکا۔ ترجمان ریسکیو کا کہنا ہے کہ کھڑکیوں کو کٹر کی مدد سے کاٹا جا رہا ہے جبکہ دیواریں ہتھوڑوں سے گرائی جا رہی ہیں تاکہ مزید تلاش ممکن بنائی جا سکے۔

ریسکیو حکام نے بتایا کہ آگ کی شدت کے باعث عمارت کے پلرز کمزور ہو چکے ہیں اور متعدد دراڑیں پڑ گئی ہیں۔ عمارت انتہائی پرانی ہونے کے باعث کسی بھی وقت گرنے کا خدشہ ہے، جس کے پیش نظر علاقے کو جزوی طور پر خالی کرا لیا گیا ہے۔

گل پلازہ سے متصل رمپا پلازہ کی دیور بھی کمزور

دوسری جانب گل پلازہ آتشزدگی کے باعث متصل رمپا پلازہ کی عمارت بھی متاثر ہوئی ہے، بتایا جاتا ہے کہ کئی گھنٹے بھڑکنے والی آگ سے رمپا پلازہ کی دیوار بھی کمزور ہوگئی ہے اور رمپا پلازہ کے پارکنگ فلور کی جانب جانے والا راستہ کسی بھی وقت گر سکتا ہے۔

شہریوں کی بڑی تعداد تماشائی بن کر ایک اور بڑے سانحے کے منتظر ہے، جبکہ پولیس رینجرز اور دیگر قانون نافذ کرنے والے اداروں کے اہلکار ہجوم کے سامنے بے بس دکھائی دے رہے ہیں۔