محکمہ موسمیات نے پیش گوئی کی ہے کہ کراچی میں آئندہ تین روز تک موسم گرم رہنے کا امکان ہے جبکہ شہر کا زیادہ سے زیادہ درجہ حرارت 37 ڈگری سینٹی گریڈ تک پہنچ سکتا ہے۔
محکمہ موسمیات کے مطابق بحیرہ عرب اور خلیج بنگال سے مرطوب ہوائیں ملک کے بالائی علاقوں میں داخل ہو رہی ہیں جبکہ ایک مغربی لہر بھی بالائی علاقوں پر اثرانداز ہونے کا امکان ہے۔
محکمہ موسمیات کا کہنا ہے کہ آج دادو اور جامشورو میں تیز ہواؤں اور گرج چمک کے ساتھ ہلکی بارش متوقع ہے جبکہ کل اور پرسوں سکھر، لاڑکانہ، جیکب آباد اور سندھ کے دیگر اضلاع میں بھی تیز ہواؤں کے ساتھ بارش کا امکان ہے۔
دوسری جانب کراچی میں بارش کا فوری امکان نہیں تاہم گرمی کی شدت برقرار رہنے کے باعث شہریوں کو احتیاطی تدابیر اختیار کرنے کی ہدایت کی گئی ہے۔