خیبرپختونخوا حکومت نے پی ٹی آئی کے سابق دورِ حکومت میں منظور کی گئی سالانہ ترقیاتی اسکیموں کی چھان بین شروع کردی ہے۔
سرکاری ذرائع کے مطابق سابق حکومت کے دور میں 1224 نئی ترقیاتی اسکیمیں شامل کی گئی تھیں، جن کی مجموعی لاگت کا تخمینہ 1348 ارب روپے تھا جبکہ رواں مالی سال کے بجٹ میں ان اسکیموں کے لیے 107 ارب روپے مختص کیے گئے تھے۔
سرکاری ذرائع کا کہنا ہے کہ جن اسکیموں کو تاحال متعلقہ فورمز سے منظوری حاصل نہیں ہوسکی ہے، انہیں ختم کرنے کا فیصلہ کیا گیا ہے۔ زیرِ جائزہ اسکیموں میں وزیراعلیٰ سہیل آفریدی اور اسپیکر بابر سلیم کے حلقوں کی اسکیمیں بھی شامل ہیں۔
مشیرِ اطلاعات خیبرپختونخوا ثمر ہارون بلور نے نجی ٹی وی سے گفتگو کرتے ہوئے بتایا کہ تمام ترقیاتی اسکیموں کا جائزہ لیا جا رہا ہے اور اس چھان بین کے دوران کسی قسم کا سیاسی اثر و رسوخ قبول نہیں کیا جائے گا۔
انہوں نے مزید واضح کیا کہ بعض اسکیموں پر نظرثانی کی جائے گی جبکہ بعض کو جوں کا توں برقرار رکھا جائے گا، اور تمام فیصلے کیس ٹو کیس اور میرٹ کی بنیاد پر کیے جائیں گے۔