پاکستان پیپلز پارٹی نے تقریباً چار دہائیوں بعد لاہور کے مینارِ پاکستان گراؤنڈ میں بڑے عوامی جلسے کے انعقاد کا اعلان کردیا ہے۔
پارٹی قیادت کے مطابق 25 جولائی کو مینارِ پاکستان میں تاریخی کنونشن اور جلسہ منعقد ہوگا، جبکہ پروگرام 25 اور 26 جولائی کی درمیانی شب تک جاری رہے گا۔
پیپلز پارٹی کے رہنما فیصل میر نے بتایا کہ آخری بار 10 اپریل 1986 کو سابق وزیراعظم شہید محترمہ بے نظیر بھٹو نے مینارِ پاکستان کے تاریخی جلسے سے خطاب کیا تھا، جس کے بعد اب تقریباً 40 سال بعد پارٹی دوبارہ اسی مقام پر بڑا عوامی اجتماع منعقد کرنے جا رہی ہے۔
انہوں نے کہا کہ 25 جولائی کا جلسہ پارٹی کی سیاسی سرگرمیوں کا اہم سنگِ میل ثابت ہوگا، جس میں ملک بھر سے کارکنوں، عہدیداروں اور رہنماؤں کی بڑی تعداد شرکت کرے گی۔ فیصل میر کے مطابق جلسے کی تیاریوں کا آغاز کر دیا گیا ہے اور اسے کامیاب بنانے کے لیے مختلف انتظامات کیے جا رہے ہیں۔