گڈانی کے قریب سمندر میں پیش آنے والے کشتی حادثے میں لاپتا دونوں ماہی گیر بھائیوں کی لاشیں حادثے کے تیسرے روز سمندر سے نکال لی گئیں۔
ریسکیو ذرائع اور پولیس کے مطابق برآمد ہونے والی لاشوں کی شناخت عامر نور بخش اور عبدالسلام نور بخش کے نام سے ہوئی ہے، جو آپس میں سگے بھائی تھے۔
پولیس کے مطابق اس حادثے میں کل 6 ماہی گیر سمندر میں ڈوب گئے تھے، جن میں سے 3 افراد کو واقعے کے فوراً بعد ریسکیو کرکے بچا لیا گیا تھا۔
ریسکیو آپریشن کے دوران ایک ماہی گیر کی لاش گزشتہ روز ملی تھی، جبکہ مزید دو لاشیں برآمد ہونے کے بعد واقعے میں جاں بحق افراد کی کل تعداد 3 ہوگئی ہے۔
لاپتا ماہی گیروں کی تلاش کے لیے ریسکیو آپریشن مسلسل تین روز تک جاری رہا، جس کے اختتام پر دونوں بھائیوں کی لاشیں مل گئیں۔ سگے بھائیوں کی لاشیں علاقے میں پہنچنے پر فضا سوگوار ہوگئی۔