کمشنر کراچی حسن نقوی کی زیر صدارت گراں فروشی اور تجاوزات کی روک تھام سے متعلق ایک اہم اجلاس منعقد ہوا، جس میں شہر کے فٹ پاتھوں سے ٹھیلے ہٹانے کے لیے بلدیاتی اداروں کو مکمل طور پر متحرک کرنے کا فیصلہ کیا گیا ہے۔
اجلاس میں روڈ سائیڈ ہوٹلوں کو کیو آر کوڈز اور ایفی ڈیوٹ کے ذریعے رجسٹرڈ کرنے کی منظوری دی گئی، جبکہ کمشنر پورٹل پر غیر رجسٹرڈ تمام روڈ سائیڈ ہوٹلوں کو سیل کرنے کی ہدایات جاری کردی گئی ہیں۔
ترجمان کمشنر کراچی کے مطابق گراں فروشی کے خلاف کی گئی حالیہ کارروائیوں کے دوران 17 گراں فروشوں کو گرفتار کیا گیا اور 39 دکانیں سیل کر دی گئیں۔
اس موقع پر کمشنر کراچی حسن نقوی نے اس بات پر زور دیا کہ شہر میں گراں فروشی اور غیر قانونی تجاوزات کے خلاف جاری مہم کو مزید مؤثر اور سخت بنانے کی شدید ضرورت ہے۔