سندھ کے کچھ محکمے بند نہ ہونے پر ملازمین میں خوف

وزیراعلیٰ سندھ کے واضح احکامات اور اِعلانیہ کے باوجود کچھ محکموں کو بند رکھنے کا نوٹیفکیشن جاری نہیں کیا گیا جس سے ملازمین میں خوف پایا جاتا ہے۔

ذرائع کے مطابق سر فہرست لوکل گورنمنٹ کے زیرِ انتظام آنے والے محکمے جس میں بلدیہ عظمیٰ کراچی ،ڈسٹرکٹ میونسپل کارپوریشن، واٹر بورڈ، سندھ بلڈنگ کنٹرول اتھارٹی،کے ڈی اے، ڈسٹرکٹ کونسل اور دیگر محکمے شامل تھے جو کہ جمعرات اور جمعہ کے روز کھلے رکھے گئے، جس سے ملازمین میں خوف وہراس پھیل گیا۔

جبکہ ان ملازمین کے اہلخانہ بھی سندھ حکومت کے اس فیصلے پریشان ہیں کہ کیا کرونا وائرس محکمے دیکھ کر فیصلے کرے گا کہ کن کن محکموں کے ملازمین کو نقصان پہنچانا ہے۔

بلدیہ عظمی کراچی اور میونسپل کارپوریشن کے دفاتر جمعرات اور جمعہ کو کھلے تو ضرور لیکن ان میں کوئی کام نہیں ہوا اور افسران و ملازمین بیٹھے وقت گزارتے رہے۔

افسران و ملازمین کے خاندانوں کے افراد نے وزیراعلیٰ سندھ، وزیر بلدیات ناصر حسین شاہ سے اپیل کی ہے کہ حکومت کے دیگر 25 محکموں کی طرح لوکل گورنمنٹ کے ان محکموں کو بھی فوری بند رکھنے کے احکامات جاری کئے جائیں۔