دنیا بھر میں تیزی سے پھیلتے کورونا وائرس کے باعث کئی ممالک میں فلائٹ آپریشنز معطل کردئے گئے ہیں جس کی وجہ سے پاکستان کی ریلیز ہونے والی فلم ’عشرت میڈ ان چائنا‘ کی کاسٹ اور دیگر ٹیم سمیت تھائی لینڈ میں پھنس گئی۔
ذرائع کے مطابق فلم ’عشرت میڈ ان چائنا‘ کی شوٹنگ کا آغاز اس وقت ہوا تھا جب عالمی ادارہ صحت کی جانب سے کورونا وائرس کو عالمی وبا قرار نہیں دیا گیا تھا۔
فلم میں مرکزی کردار نبھانے والے اداکار شمعون عباس کا میڈیا سے گفتگو میں کہنا تھا کہ فلم کی آدھی ٹیم رواں سال فروری کے آخر میں تھائی لینڈ پہنچ گئی تھی، اس وقت کورونا وائرس کا خطرہ کافی کم تھا۔
انہوں نے مزید بتایا کہ فلم کی کاسٹ میں حسن شہریار یاسین، مانی، مصطفیٰ چوہدری، علی کاظمی اور صنم سعید شامل ہیں، البتہ سارہ لورین اور میں کچھ عرصہ بعد فلم کی کاسٹ کا حصہ بنے۔
شمعون عباسی کا کہنا تھا کہ جب ہم تھائی لینڈ پہنچ گئے تو اس کے بعد معاملات مشکل ہونا شروع ہوئے، پہلے یہ وائرس چین میں پھیلا، جس کے بعد اس نے مغربی ممالک کو اپنی لپیٹ میں لے لیا اوراب یہ پاکستان میں بھی پھیل چکا ہے۔
انہوں نے بتایا کہ مانی، حسین شہریار، علی کاظمی اور مصطفیٰ چوہدری تو پاکستان واپس آگئے تاہم باقی کاسٹ کی فلائٹ 25 مارچ کی تھی، لیکن تب تک ایئرپورٹس بند کردئے گئے۔
اداکار کے مطابق اب وہ 4 اپریل کا انتظار کررہے ہیں تاکہ وہ پاکستان واپس جاسکیں۔
اداکارہ صنم سعید نے بھی میڈیا سے بات چیت کرتے ہوئے تصدیق کی کہ وہ فلم کی باقی ٹیم کے ہمراہ تھائی لینڈ میں محفوظ ہیں۔
اداکار شمعون عباسی کا کہنا تھا کہ ہم لوگ بینکاک سے 4 گھنٹے کی دوری پر ایک جنگل کے قریب ہیں لیکن یہ جگہ کافی محفوظ ہے۔