معروف بالی ووڈ اسٹار اجے دیوگن نے سوشل میڈیا پر اپنی اہلیہ کاجول اور بیٹی نیسہ کی صحت کے حوالے سے افواہوں کی تردید کر دی۔
بھارتی میڈیا کی ایک رپورٹ کے مطابق گزشتہ کچھ روز سے سوشل میڈیا پر یہ افواہیں گردش کر رہی ہیں کہ بھارتی اداکارہ کاجول اور اُن کی بیٹی نیسہ کورونا وائرس میں مبتلا ہو گئیں۔
رپورٹ کے مطابق مختلف بھارتی ویب سائٹس پر ان سے متعلق خبر شائع کی جا رہی تھیں کہ اجے دیوگن کی بیٹی نیسہ میں کورونا وائرس کی علامات ظاہر ہو رہی ہیں جس کے بعد اُن کی بیٹی اور اہلیہ کاجول نے کورونا وائرس کا ٹیسٹ کروایا ہے جس کے بعد اُن دونوں کا ٹیسٹ مثبت آیا ہے۔
گزشتہ روز بالی ووڈ کے معروف اداکار اجے دیوگن نے سماجی رابطے کی ویب سائٹ ٹوئٹر پر اپنی اہلیہ کاجول اور بیٹی نیسہ کی صحت سے متعلق جھوٹی افواہوں کا جواب دیتے ہوئے ٹوئٹ کیا۔
اداکار اجے دیوگن نے اپنے ٹوئٹ میں لکھا کہ کاجول اور نیسہ کی صحت کے حوالے سے آپ سب کا پوچھنے کے لئے بہت شکریہ۔
بالی ووڈ اداکار نے جواب دیتے ہوئے لکھا کہ کاجول اور نیسہ بالکل ٹھیک ہیں اور اُن کی صحت سے متعلق گردش کرتی تمام افواہیں بے بنیاد اور جھوٹی ہیں۔