موجودہ وسائل سے مشکل صورتحال پر قابو پالیں گے، وزیر اعظم عمران خان

تفصیلات کے مطابق اسلام آباد میں ایک تقریب سے خطاب کے دوران وزیراعظم عمران خان کا کہنا تھا کہ کورونا وائرس کے باعث پوری دنیا مشکل میں ہے ، پاکستان میں وبا کا پھیلاؤ دوسرے ممالک کی نسبت کم ہے اور ہم کورونا وائرس کے حوالے سے ہر روز میٹنگ کرتے ہیں، ہمارے ایک طرف کورونا دوسری طرف بھوک ہے۔

کورونا وائرس کے پیش نظر وزیراعظم کا کہنا تھا کہ اللہ کا خاص کرم ہے کہ جیسی خراب صورتحال اس وقت دوسرے ممالک میں ہے ویسی ہمارے ہاں نہیں، شادی ہال،اسکول، عوامی مقامات مزید دو ہفتے کے لئے بند کر دئے ہیں، لوگوں کے اجتماع سے وائرس پھیلنے کا خدشہ زیادہ ہوتا ہے تاہم موجودہ وسائل سے ہم بہت جلد کورونا پر قابو پالیں گے۔

وزیراعظم عمران خان نے کہا کہ کورونا کے اثرات سے کمزور طبقے کو سب سے زیادہ خطرہ ہے، مزدوروں کو بیروزگاری سے بچانے کیلئے بھرپور اقدامات کر رہے ہیں، مزدور طبقے کی امداد کیلئے پیکیج کا اعلان کیا گیا ہے جس میں ہم ایک کروڑ 20 لاکھ افراد کو احساس پروگرام سے پیسے دیں گے۔

دورانِ اجلاس وزیراعظم نے مزید کہا کہ ہم نے فیصلہ کر لیا ہے کنسٹرکشن انڈسٹری کو کھولنا ہے، کنسٹرکشن انڈسٹری کیلئے کل ایک بڑے پیکیج کا اعلان کروں گا، ملک میں صنعت کا فروغ حکومت کی ترجیح ہے، بزنس کمیونٹی کے بغیر پاکستان آگے نہیں بڑھ سکتا۔