ایم کیو ایم کے رہنما فیصل سبزواری نے نجی ٹی وی کے پروگرام میں شرکت کی جس میں انہوں نے بتایا کہ ان کی اہلیہ، دو بیٹیاں بھی کورونا وائرس کا شکار ہوگئیں جبکہ ان کی دوسری اہلیہ اور ایک بیٹی کا کورونا ٹیسٹ منفی آیا ہے۔
فیصل سبزواری نے کہا کہ بدقسمتی ہے سیاسی اور مذہبی قیادت فراست کے ساتھ لوگوں کو کورونا وائرس کی آگاہی نہیں دے سکی، رہنما بڑی بڑی میٹنگز میں ماسک اور دستانے نہیں پہن رہے۔
ان کا کہنا تھا کہ جب تک ریاست اور حکومتیں غریب آدمی کو اطمینان نہیں دیں گی کہ انہیں اور ان کے بچوں کو گھر میں بھوکا نہیں مرنے دیں گے، تب تک وہ لاک ڈاؤن کا احترام نہیں کرے گا۔
انہوں نے بتایا کہ کورونا تیزی سے متاثر کرتا ہے، مجھے دو روز قبل بخار چڑھا کل میں کھڑے ہوکر نماز نہیں پڑھ پایا، آج بمشکل آپ سے بات کررہا ہوں۔
فیصل سبزواری نے کہا کہ میری والدہ عمر رسیدہ اور پھیپھڑوں سمیت دیگر بیماریوں میں مبتلا ہیں، میرے جیسے اثر و رسوخ والے آدمی کو والدہ کیلئے کراچی کے کسی بہتر نجی اسپتال میں جگہ نہیں مل پائی، یہی وجہ ہے کہ ان کیلئے گھر پر ہی آکسیجن کا انتظام کررہا ہوں، وزیراعلیٰ سندھ نے بھی مجھ سے رابطہ کیا ہے اور تعاون کا کہا ہے۔
ایم کیو ایم کے رہنما نے عوام سے اپیل کرتے ہوئے کہا کہ میری شہریوں سے گزارش ہے کہ وہ ملک یا عوام کیلئے نہیں بلکہ اپنے اور اپنے اہل خانہ کیلئے اپنا خیال رکھیں، ہر شخص کی قوت مدافعت ایسی نہیں کہ کورونا کو شکست دے سکے۔