گزشتہ چند دنوں سے ملک میں کورونا وائرس کے کیسز میں واضح کمی آئی ہے لیکن ماہرین کا کہنا ہے کہ عوام کو اب بھی وبا کے اثر سے سنبھلنے میں تھوڑا وقت لگے گا۔
تفصیلات کے مطابق پاکستان اسلامک میڈیکل ایسوسی ایشن اور گیلپ پاکستان کے حالیہ سروے میں یہ انکشاف ہوا ہے کہ وائرس کو کنٹرول کرنے میں ایک سال سے زائد کا عرصہ لگ سکتا ہے۔
سروے 400 سے زائد ڈاکٹروں اور صحت کے شعبے سے منسلک پیشہ ور افراد نے کیا۔ نتائج میں 55 فیصد ڈاکٹروں نے کہا کے اس میں ایک سال سے زائد کا عرصہ لگ سکتا ہے جب کہ 41 فیصد کا کہنا تھا کہ کچھ مہینے لگ سکتے ہیں۔
تاہم 4 فیصد ڈاکٹروں کا اندازہ تھا کہ چند ہفتوں میں دنیا کورونا وائرس پر قابو پا لے گی۔ سروے میں شامل 66 فیصد ڈاکٹروں اور صحت کے شعبے سے منسلک افراد نے حکومت کو حالات میں بہتری تک لاک ڈاؤن جاری رکھنے کا مشورہ بھی دیا۔
البتہ 4 فیصد کا خیال تھا کہ لاک ڈاؤن عید الاضحیٰ تک جاری رکھنا چاہیے جبکہ 8 فیصد نے لاک ڈاؤن فوراً ختم کرنے کا مشورہ دیا۔