مقبولیت کی بلندیوں کو چھونے والا ترک ڈرامہ سیریل ارطغرل غازی کے مرکزی کردار اور ہیرو انجن التان نے پاکستانی الیکشن میں حصہ لینے کے سوال پر انتہائی دلچسپ جواب دیا۔
چند روز قبل انجن التان کی پاکستان میں بے تحاشہ مقبولیت کے پیشِ نظر پاکستان کے سرکاری ٹی وی چینل پی ٹی وی سے ان کا انٹرویو نشر کیا گیا جس میں میزبان نے ان سے نہایت دلچسپ سوال پوچھا کہ ارطغرل کے کردار کو پاکستان میں بہت زیادہ پسند کیا جاتا ہے لہٰذا اگر آپ بطور ارطغرل پاکستانی الیکشن میں حصہ لیں تو زبردست کامیابی حاصل کرسکتے ہیں اس بارے میں آپ کیا کہتے ہیں؟
اس سوال پر پہلے تو انجن التان ہنس پڑے اور پھر انہوں نے کہا اتنی پسندیدگی کا شکریہ۔ یہ آپ لوگوں کی ذرہ نوازی ہے، میں آپ سب کا بے حد مشکور ہوں۔ مجھے پاکستان سے بہت محبت ملی ہے، اتنی محبت ملنے اور چاہے جانے پر یقیناً بہت اچھا محسوس ہوتا ہے۔
ترک اداکار نے پاکستان کے ساتھ اپنی محبت اور وابستگی بیان کرتے ہوئے کہا اس طرح اپنے ایک بھائی ملک پاکستان سے محبت کے اظہار نے مجھے بڑا جذباتی بنا دیا ہے، میں ویسے بھی پاکستان کا بڑا مداح ہوں لیکن میں آپ کو بتادوں کہ سیاست، سیاستدانوں کا کام ہے اور میں ایک اداکار ہوں اور میرا کام اداکاری کرنا ہے لہٰذا یہ ہو نہیں سکتا۔