بیشتر اوقات نیند کے دوران منہ سے رال بہہ نکلنے کو کئی افراد پریشان کن مسئلہ اور باعث شرمندگی بات سمجھتے ہیں لیکن سائنسدانوں نے اس حوالے سے حیرت انگیز انکشاف کیا ہے کہ اگر آپ کے ساتھ نیند کے دوران ایسا معاملہ پیش آتا ہے تو پریشانی والی کوئی بات نہیں بلکہ آپ تو بہت خوش قسمت ہیں۔
سائنسدانوں کا کہنا ہے کہ جو لوگ پُرسکون نیند حاصل کرتے ہیں اور جن کے خواب انتہائی مثبت نوعیت کے ہوتے ہیں ان کی رال نیند کے دوران اکثر بہہ نکلتی ہے۔ یعنی نیند کے دوران رال بہنے کا مطلب یہ ہوتا ہے کہ نیند کا ابتدائی مرحلہ جسے ریپڈ آئی موومنٹ مرحلہ کہتے ہیں بغیر کسی رکاوٹ اور گڑ بڑ کے مکمل ہوتا ہے جس کی وجہ سے آپ پرسکون اور گہری نیند میں سوتے ہیں۔
یہ اس بات کی بھی علامت ہے کہ آپ کی نیند میں کوئی خرابی نہیں ہے اور آپ کا جسم اور دماغ نیند سے بھرپور استفادہ کررہا ہے۔
ماہرین کا یہ بھی کہنا ہے کہ جن لوگوں کے ساتھ نیند کے دوران کبھی بھی رال بہنے کا واقعہ پیش نہیں آتا انہیں نیند سے متعلقہ کچھ نہ کچھ مسائل لازمی درپیش رہتے ہیں۔ وہ افراد یا تو پوری نیند حاصل نہیں کررہے ہوتے یا ان کو نیند پرسکون نہیں آتی۔