پاکستان نے ڈیجیٹل معیشت کی جانب ایک اہم پیش رفت کرتے ہوئے اسٹریٹجک بٹ کوائن ریزرو قائم کر دیا ہے، جو ملک کو سافٹ پاور سے اسمارٹ پاور کی جانب لے جانے کا ایک عملی قدم تصور کیا جا رہا ہے۔
وزیراعظم کے معاونِ خصوصی اور بلاک چین ٹیکنالوجی کے ماہر بلال بن ثاقب نے اس اقدام کو پاکستان کی عالمی سطح پر نئی ڈیجیٹل شناخت قرار دیا ہے۔
ان کا کہنا ہے کہ اس منصوبے کے ذریعے نہ صرف پاکستان کرپٹو اور بلاک چین ٹیکنالوجی میں نمایاں ترقی کرے گا بلکہ بین الاقوامی سطح پر کرپٹو لیڈر شپ کے لیے بھی ایک مضبوط دعوے دار کے طور پر سامنے آئے گا۔
پاکستان کے اس اقدام کو ڈیجیٹل خودمختاری، اقتصادی تنوع اور ٹیکنالوجی میں خود انحصاری کی جانب ایک بڑا قدم قرار دیا جا رہا ہے۔
ماہرین کے مطابق، اسٹریٹجک بٹ کوائن ریزرو نہ صرف کرپٹو اثاثوں کے ذریعے معیشت کو مستحکم کرنے میں مدد دے گا بلکہ نوجوانوں کے لیے ڈیجیٹل معیشت میں روزگار کے نئے مواقع بھی پیدا کرے گا۔