پاکستان کے نامور عالمِ دین مولانا طارق جمیل نے اپنے بیان سے متعلق سوشل میڈیا پر گردش کرتی خبروں کو جعلی اور بے بنیاد قرار دے دیا۔
سماجی رابطے کی ویب سائٹ ٹوئٹر پر اپنے تصدیق شدہ اکاؤنٹ سے پیغام جاری کیا جس میں تحریر تھا کہ ''میرا اس بیان سے کوئی لینا دینا نہیں ہے، یہ جعلی خبر ہے''۔
ساتھ ہی مولانا صاحب نے جعلی بیان کا اسکرین شاٹ بھی شئیر کی۔
ان کا کہنا تھا کہ ''میرے درست بیانات کے لیے میرے تصدیق شدہ سوشل میڈیا پلیٹ فارمز کے ساتھ جڑے رہیں''۔
مولانا طارق جمیل نے مزید کہا کہ ''اللّہ تعالیٰ ہمیں جھوٹی خبریں پھیلانے سے بچائے''۔
یاد رہے سوشل میڈیا پر مولانا طارق جمیل کے نام سے ایک بیان گردش کر رہا تھا جسے مولانا نے مسترد کر کے جعلی قرار دے دیا ہے۔ وہ بیان اسلام آباد میں سرکاری ملازمین کے احتجاج کے حوالے سے تھا جس میں پولیس کی جانب سے ملازمین پر آنسو گیس کے گولے فائر کیے گئے اور مظاہرین کے علاوہ پولیس اہلکار بھی زخمی ہوگئے۔