پیسے نہیں تھے تو ڈاکٹر نے بچہ ہی بیچ دیا لیکن پھر۔۔۔ بل کے پیسے نہ ہونے پر ڈاکٹر کا والدین سے نامناسب رویہ، پھر کیا ہوا؟

اب تک دنیا بھر سے ہم نے کئی ایسے واقعات سنے ہیں جس میں لوگوں کے پاس پیسے نہ ہونے پر اسپتال والوں نے بل معاف کر دیا لیکن کچھ روز قبل پاکستان کے صوبہ پنجاب میں ایک ایسا واقعہ پیش آیا جس نے پوری انسانیت کو شرمسار کر دیا۔

تفصیلات کے مطابق پنجاب کے شہروں میاں چنوں اور عبدالحکیم کے وسط میں واقع تلمبا (Tulamba) میں ایک ماں نے پرائیویٹ اسپتال میں بچے کو جنم دیا۔ تاہم ماں باپ کے پاس اسپتال کا بل ادا کرنے کے لیے مطلوبہ رقم موجود نہیں تھی جس پر ڈاکٹر نے ماں باپ کو مشورہ دیا کہ ''اگر پیسے نہیں ہیں تو اپنا بچہ بیچ دو''۔

یہ ایسا جملہ ہے جو پتھر انسان کے دل کو بھی تڑپا دے، اور یہ جملہ ایک ڈاکٹر نے ماں باپ سے کہا۔ ان ماں باپ سے جن کا بچہ ابھی ابھی دنیا میں آیا ہو۔

تاہم ماں باپ کے صاف انکار کرنے پر ڈاکٹر نے زبردستی بچہ لے لیا اور اسے بیچ دیا۔

ساتھ ہی اسپتال نے والدین پر سخت دباؤ ڈالا تاکہ وہ کسی قسم کی قانونی کارروائی نہ کر سکیں۔

بے انتہا دباؤ ہونے کے باوجود والدین نے تھانے کا رخ کیا اور رپورٹ درج کروا دی۔

پولیس نے بروقت کارروائی کر کے اسپتال پر چھاپہ مارا جبکہ ڈاکٹر کو گرفتار کر لیا۔