آن لائن آئی فون آرڈر کرنے والے ہیں تو زرا رُکیے کہیں آپ کے ساتھ بھی ایسا ہی کچھ نہ ہو جائے۔
حال ہی میں ایک چینی خاتون نے ایپل کی آفیشل ویب سائٹ سے آئی فون 12 پرو میکس کا آرڈر کیا لیکن جب انہیں آرڈر موصول ہوا تو وہ دیکھ کر دنگ ہی رہ گئیں۔
خاتون نے مقامی سوشل میڈیا پلیٹ فارم ویبو پر ایک پوسٹ شیئر کی جس میں انہوں نے بتایا کہ آئی فون 12 پرو میکس خریدنے کے لیے انہوں نے 1500 ڈالرز کی رقم ادا کی تھی مگر جب پارسل ان تک پہنچا تو ان کے ہوش ہی اُڑ گئے۔
حیرانی کی بات یہ تھی خاتون نے آرڈر ایپل کی آفیشل ویب سائٹ کے ذریعے ہی کیا تھا لیکن جب انہیں آرڈر موصول ہوا تو اس میں فون کی بجائے ایپل جوس یعنی سیب کا جوس تھا۔
خاتون نے سوشل میڈیا کے ذریعے بتایا کہ پارسل انہیں براہ راست موصول نہیں ہونا تھا بلکہ انہوں نے پارسل کی ترسیل کے لیے اپنے گھر کے قریب موجود ایک لاکر کا انتخاب کیا تھا۔
اس حوالے سے ایپل کمپنی اور ایکسپریس میل سروس (ایپل کے آفیشل کوریئر پارٹنر) نے دعویٰ کیا ہے کہ آئی فون 12 اس ہی جگہ پر بھیجا گیا ہے جس کی انہیں درخواست موصول ہوئی تھی۔
تاہم چینی خاتون کا کہنا ہے کہ انہیں فون کی جگہ ایپل جوس ہی موصول ہوا، انہوں نے اس واقعے کی جانچ کے لیے مقامی پولیس اسٹیشن میں مقدمہ بھی درج کروا دیا ہے۔
جبکہ واقعہ پیش آنے کے بعد کورئیر کمپنی نے بھی تحقیقات شروع کر دی ہیں۔