کراچی سے افسوس ناک خبر سامنے آئی ہے۔
تفصیلات کے مطابق گلستان جوہر میں محکمہ موسمیات کے قریب دکان میں دھماکے کے نتیجے میں 2 بچے اور خاتون جاں بحق ہوگئے۔
پولیس کا کہنا ہے کہ گلستان جوہر میں دھماکا الجدید موڑ کے قریب یونیورسٹی روڈ پر ہوا جس کی شدت کی وجہ سے دھماکے کی آواز دور تک سنی گئی جب کہ دھماکے سے عمارت اور ساتھ کی دکانوں کو بھی شدید نقصان پہنچا۔
پولیس کے مطابق دھماکے کی نوعیت کا پتا لگانے کے لیے بم ڈسپوزل اسکواڈ کو طلب کرلیا گیا ہے جو یہ تعین کرے گا کہ آیا دھماکا بیٹریوں کی وجہ سے ہوا یا سلنڈر کا پھٹنا اس کی وجہ بنا تاہم ابتدائی طور پر یہ واقعہ حادثہ لگتا ہے جس میں دہشت گردی کے شواہد سامنے نہیں آ رہے۔
تاہم دھماکے کے نتیجے میں 2 بچوں کے جاں بحق ہوئے ہیں جب کہ جناح اسپتال کی ڈائریکٹر سیمی جمالی کا کہنا ہے کہ دھماکے میں جاں بحق ایک خاتون کی لاش بھی جناح لائی گئی ہے۔
جاں بحق ہونے والے دونوں بہن بھائی ہیں جن کی شناخت فاطمہ اور عبداللہ کے نام سے ہوئی جب کہ دیگر 4 زخمیوں کو اسپتال میں طبی امداد فراہم کی جارہی ہے۔