دنیا کی دوسری بلند ترین چوٹی کے ٹو سے اچھی اور اطمینان بخش خبر سامنے آئی ہے۔
تفصیلات کے مطابق کے ٹو کے بیس کیمپ پر موبائل ٹاور نصب کر دیا گیا ہے۔ کے ٹو پر بھی موبائل فون کا استعمال کیا جاسکے گا، بارڈر ایریاز میں ٹیلی کمیونیکیشن کی سہولت دینے والے سرکاری ادارے اسپیشل کمیونیکیشن آرگنائزیشن نے گلگت بلتستان حکومت کے تعاون موبائل ٹاور نصب کیا ہے۔
اس اقدام کا مقصد چوٹی سر کرنے والے سیاحوں کو جدید مواصلاتی ٹیکنالوجی پر مبنی سہولیات فراہم کرنا ہے۔ موبائل ٹاور کی تنصیب سے مہم جوئی کے دوران کوہ پیماؤں کو نا صرف اپنی ٹیم کے ساتھ باہمی رابطوں میں آسانی ہوگی بلکہ کسی ہنگامی صورتحال میں کوہ پیماؤں کو متعلقہ حکام کی جانب سے بروقت امداد بھی فراہم کی جا سکے گی۔
اس کے علاوہ موبائل ٹاور کو نصب کرنے سے کوہ پیماؤں اور سیاحوں کیلئے اپنے دوستوں اور اہلخانہ سے رابطہ بھی ممکن ہوگا۔