وفاق نے بلوچستان کی جیلوں میں سزا یافتہ قیدیوں کے لیے عرش، دیت اور دمن ادائیگی کی مد میں 80 لاکھ روپے جاری کردیئے۔
وزیر اعلیٰ بلوچستان میر سرفراز بگٹی اور وفاقی وزیر برائے انسانی حقوق، انصاف و قانون سینیٹر اعظم نذیر تارڑ کی مشترکہ کوششوں کے نتیجے میں وفاقی حکومت نے بلوچستان کے قیدیوں کے لیے ایک اہم اور انسان دوست اقدام اٹھایا ہے۔
وفاقی حکومت کی جانب سے ڈائریکٹر ہیومن رائٹس کے توسط سے جاری مذکورہ رقم ایڈیشنل چیف سیکریٹری داخلہ بلوچستان حمزہ شفقات نے چیک کی صورت میں وصول کی۔
رقم سے ان قیدیوں کو رہائی دلوائی جائے گی جو مالی استطاعت نہ ہونے کی وجہ سے سزائیں پوری کرنے کے باوجود جیلوں میں مقید ہیں۔
اس موقع پر ایڈیشنل چیف سیکریٹری نے وزیر اعلیٰ بلوچستان اور وفاقی وزیر اعظم نذیر تارڑ کا شکریہ ادا کرتے ہوئے کہا کہ مذکورہ اقدام نہ صرف عدالتی نظام انصاف میں بہتری لائے گا بلکہ قیدیوں اور ان کے خاندانوں کے لیے امید کی کرن ثابت ہوگا۔
انہوں نے یقین دلایا کہ حکومت بلوچستان رقم کو شفاف طریقے سے مستحق قیدیوں میں تقسیم کرے گی تاکہ وہ قانونی تقاضے پورے کرتے ہوئے جیلوں سے رہائی پا سکیں۔