زیادہ سے زیادہ پیسے کمانے کی لالچ میں انسان ہر غلط اور صحیح کام کرنے کو تیار ہے یہی وجہ ہے کہ ہمارے ملک میں نومولود بچوں کو اغوا کرنے کے واقعات بے تحاشا بڑھتے جا رہے ہیں جس کا منہ بولتا ثبوت یہ ہے کہ کراچی میں اینٹی وائلینٹ سیل نے گلشن اقبال میں دائی پروین کے گھر کارروائی کی اور اس کارروائی کے نتیجے میں پولیس نے دائی پروین اور اسکی بیٹی کو گرفتار کر لیا۔
ملزمہ پروین جو کہ ایک دائی ہے اور اسی کے گھر وقاص نامی شہری کے بچے کی پیدائش ہوئی لیکن ملزمہ نے بچے کے والدین کو یہ بتایا کہ آپکا بچہ مرا ہوا پیدا ہوا ہے جبکہ حقیقت یہ نہیں تھی لیکن جب بچے کے والد وقاص صاحب نے بچے کو دیکھنا چاہا تو اس وقت وہ والدین کو کوئی خاطر خواہ جواب نہیں دے سکی کہ کیوں آپکو بچےسے ملنے نہیں دیا جاسکتا، جس پر بچے کے والدین کو دائی پر شک ہوگیا۔
اور بچے کے والد نے گلشن اقبال تھانے میں دائی کیخلاف مقدمہ درج کروا دیا جس پر پولیس نے دائی کو گرفتار کر کے پوچھ گچھ شروع کر دی۔
دوران تفتیش ملزمہ پروین نے انکشاف کیا کہ اس نے بچے کو 3 لاکھ میں ایک بے اولاد جوڑے کو فروخت کیا ہے اور ملزمہ ہی کی نشاندہی پر پولیس نے58 دن کی کارروائی کے بعد بچے کا بازیاب کروالیا۔