کینسر ایک تکلیف دہ مرض ہے جس کی تشخیص شروعاتی سٹیج میں ہو جائے تو قابلِ علاج ہوسکتا ہے البتہ آخری سٹیج میں زندہ بچنے کی امیدیں ختم ہو جاتی ہیں مگر جو لوگ کینسر کے مریض ہوتے ہیں صرف وہی اپنی بیماری سے دوچار نہیں ہوتے بلکہ ان کے ساتھ ان کا خیال کرنے والے زیادہ پریشان ہوتے ہیں اور ان کی زندگی پوسٹ ٹرامیٹک سنڈروم یا پی ٹی ایس ڈی کا شکار ہو جاتی ہے۔
21 سالہ لڑکی کے جذباتی تاثرات:
21 سالہ لڑکی ہانیہ (فرضی نام) اپنے والدین کی اکلوتی بیٹی تھی، والد پہلے ہی دنیا سے جاچکے تھے اور پھر والدہ کا کینسر ہوگیا جس کے آخری سٹیج میں معلوم ہوا اس وقت تک بہت دیر ہوچکی تھی، ہانیہ نے ماں کا خیال آخری وقتوں میں خود اکیلے ہی رکھا لیکن ہانیہ کہتی ہیں:''
میری ماں 2 سال قبل کینسر کی تکلیف سے انتقال کرگئیں لیکن آج بھی مجھے ان کی وہ آخری رات یاد ہے جب صبح کے 4 بج رہے تھے ان کو اچانک قے آئی اور وہ زور سے چلا کر کہہ رہی تھیں بیٹا مجھے بچالو، میں ابھی مرنا نہیں چاہتی تم اکیلی ہو یہ کہتے ہوئے ہی ماں چل بسیں، ان کو خود اپنے سامنے قبر میں جاتے ہوئے دیکھا لیکن ماں کے جانے کے 2 سال بعد بھی مجھے راتوں کو ڈراؤنے خواب آتے ہیں اور ماں کی حالت نظروں سے گزرتی ہے اور یوں لگتا ہے جیسے کہ دوبارہ مجھے کینسر ہونے والا ہے میں دن رات قرب میں مبتلا ہوں، کیسے میری ماں نے اتنی تکلیف سہی ہوگی؟
''
یہ ڈر اور خوف کیوں؟
دراصل کینسر کو ہمارے معاشرے میں ایک ٹیبو یا کوئی الگ سی چیز سمجھی جاتی ہے اور بچپن ہی سے ایسی باتیں سنی ہوتی ہیں جو دماغ میں گھر کر لیتی ہیں اور پھر جب کوئی اپنا پیارا اس مرض میں مبتلا ہو اور جانبر نہ ہو تو ان کا ہر تکلیف دہ لمحہ دماغ میں جگہ بنا لیتا ہے اور خوف کا مقام بلند ہوتا جاتا ہے جسے پوسٹ ٹرامیٹک سنڈروم کہا جاتا ہے۔
اس خوف میں ویسے تو کوئی بھی مبتلا ہوسکتا ہے لیکن کینسر کے مریضوں کا خیال رکھنے والے اپنی دماغی صلاحیتیں دنیا کے دیگر مشغلوں سے چھوڑ کر صرف بیماری اور پریشانی میں چلے جاتے ہیں جس کی وجہ سے ان کے مزاج میں تبدیلیاں انے لگتی ہیں۔