ریاض :سعودی عرب نے فیفا ورلڈکپ کے ٹکٹ ہولڈرز کیلئے ویزے کا اعلان کرتے ہوئے کہا ہے کہ سعودیہ قطر میں ہونے والے ورلڈکپ 2022 کے ٹکٹ ہولڈرز کے لیے ویزا کی منظوری دے گا۔
شائقین کو ٹورنامنٹ کے آغاز سے 10 دن پہلے مملکت میں داخل ہونے کی اجازت دیتے ہوئے ویزا دیا جائے گا اور انہیں 60 دن تک رہنے کی اجازت بھی دی جائے گی۔
سعودی وزارت خارجہ کاکہنا ہے کہ ویزا ہولڈرز کو اس مدت کے دوران ملک سے باہر جانے اور دوبارہ داخل ہونے کی اجازت بھی ہوگی البتہ ویزے کے لیے درخواست دینے والے کسی بھی شخص کو سعودی عرب جانے سے پہلے میڈیکل انشورنس بھی حاصل کرنا ہوگی۔
رواں سال نومبر میں قطر میں ہونے والا فیفا ورلڈ کپ مشرق وسطیٰ میں ہونے والا پہلا فٹبال ورلڈ کپ ہے۔ 2002 میں کوریا اور جاپان میں منعقد ہونے والے فٹبال ورلڈ کپ کے بعد قطر اس انٹرنیشنل ٹورنامنٹ کی میزبانی کرنے والا دوسرا ایشیائی ملک بھی ہے۔
بین الاقوامی میڈیا کی رپورٹ کے مطابق 21 نومبر سے 18 دسمبر 2022 تک قطر میں کھیلا جانے والا یہ ورلڈ کپ تاریخ کا سب سے مہنگا فیفا ورلڈ کپ ہوگا۔
قطر نے ملک میں فٹبال ورلڈ کپ کے انعقاد کے لیے انفرااسٹرکچر پر 200 بلین ڈالر خرچ کیے ہیں اور ہر اسٹیڈیم کو ایئر کنڈیشنڈ بنایا ہے۔
قطراور فیفا آرگنائزنگ کمیٹی کے معاہدے کے تحت چند سیاحتی علاقوں میں شراب نوشی کی اجازت بھی دی جائے گی۔فیفا فٹ بال ٹورنامنٹ کے لیے اس ماہ 2.45 ملین ٹکٹس فروخت ہوچکی ہیں۔