اتوار کو کھیلے جانے والے ایشیاء کپ میں پاکستان اور بھارت کے میچ کے بعد قومی کرکٹ ٹیم کے کپتان بابر اعظم پر لوگوں کی تنقید ان کے والد سے برداشت نہ ہوسکی۔ جس پر ان کے والد اعظم صدیقی اپنے بیٹے کے حق میں میدان میں آگئے۔
بابر اعظم پر تنقید کرنے والوں ان کے والد نے اپنے انسٹاگرام اکاؤنٹ پر جواب دیا ہے۔
اعظم صدیقی نے انسٹاگرام پر لکھا کہ سلام پاکستان پاکستان اپنا اہم میچ میں انڈیا کے خلاف اچھا مقابلہ کر کے ہار گیا کئی بات نہیں انشاء اللہ آئندہ ہم جیتیں گے پر جس طرع لوگ اور ٹی وی پر پاکستانی ٹیم اور خاص کر بابر کو شدید تنقید کا نشانہ بنا رہے ہیں انتہائی قابل افسوس بات ہے۔
انہوں نے لکھا کہ بھارتی بلے باز ویرات کوہلی نے تین سال سے زیادہ عرصہ سے سنچری نہیں کی لیکن ان کی قوم نے اُن کی وہی عزت اور احترام برقرار رکھا ہوا ہے۔
بابر اعظم کے والد نے لکھا کہ یا د رہے کہ ہم مسلمان قوم ہیں اور اور ہمارے دین کی بنیاد اخلاق اور رحم دلی پر ہے۔
اور جو فضول میں اپنی باتوں سے زہر پھینک رہے ہیں اُن کے لیے مجھے اور میرے بیٹے کو اللہ اپنی رحمت سے یہاں تک لایا ہے پھربھی 15 سال شدید محنت لگی میں اُن کو جواب دے کر یہ فا صلہ ختم نہیں کرنا چاھتا اورنہ برابری کرنا چاہتا ہوں اللہ ہی عزت کا مالک ہے اُسی نے عزت دی اور وہ ہی اس کی حفاظت کریں گے۔ پوسٹ کے آخر میں اعظم صدیقی نے پا کستان زندہ باد بھی لکھا۔
خیال رہے پاکستان ایشیاء کپ کا اپنا دوسرا میچ آج شارجہ میں ہانگ کانگ کے خلاف کھیلے گا۔