دبئی میں جاری ایشیا کپ ٹی 20 ٹورنامنٹ کے گروپ اے کے میچ میں پاکستان نے ہانگ کانگ کو شکست دے کر سپر 4 مرحلے کیلئے کوالیفائی کرلیا۔
پاکستان کے 194 رنز کے ہدف کے تعاقب میں ہانگ کانگ کا کوئی بھی بیٹس مین قومی فاسٹ بولرز کے سامنے زیادہ دیر تک نہ کھیل سکا اور پوری ٹیم صرف 38 رنز بناکر آؤٹ ہوگئی ۔
شارجہ میں کھیلےگئے میچ میں ہانگ کانگ کے کپتان نزاکت خان نے ٹاس جیت کر پاکستان کو پہلے بیٹنگ کی دعوت دی تھی۔
پاکستان ٹیم نے مقررہ 20 اوورز میں 2 وکٹوں کے نقصان پر 193 رنز بنائے۔ محمد رضوان 78 رنز بناکر نمایاں رہے۔ قومی ٹیم نے آخری اوور میں خوشدل کے 4 چھکوں کی بدولت 29 رنز اسکور کیے۔
کپتان بابر اعظم 9 رنز بناکر آؤٹ ہوگئے۔ فخر 41 گیندوں پر 53 رنز بناکر آؤٹ ہوگئے۔ ہانگ کانگ کی جانب سے احسان خان نے 2 وکٹیں حاصل کیں۔
واضح رہے آج ہارنے والی ٹیم یعنی ہانگ کانگ کا ایشیا کپ کا سفر یہیں ختم ہوا۔