ہالی ووڈ کے مقبول اداکار اور سابق ڈبلیو ڈبلیو ای کے ریسلر ڈوین جانسن بھی پاک بھارت میچ کے لیے پر جوش ہیں اور اس حوالے سے انہوں نے خصوصی پیغام شئیر کیا ہے جو بہت مشہور ہو رہا ہے۔
ڈوین جانسن نے اپنی نئی فلم ’ بلیک ایڈم ‘ کے پروموشنل ایونٹ کے دوران پاک بھارت ٹاکرے کے بارے میں اپنے خیالات کا اظہار کیا ہے۔
سوشل میڈیا پر اس پروموشنل ایونٹ کی ویڈیو وائرل ہوگئی ہے۔
اس ویڈیو میں ڈوین دی راک جانسن یہ کہتے ہوئے نظر آرہے ہیں کہ جب دنیا کے بہترین حریف ایک دوسرے سے ٹکرائیں گے تو دنیا تھم ہوجائے گی، یہ صورتحال ایک کرکٹ میچ سے بالاتر ہے اور یہ وقت پاکستان اور بھارت کے مقابلے کا ہے۔
اُنہوں نے مزید کہا کہ’یہ دنیا کا عظیم مقابلہ ہے۔ ڈوین جانسن کی یہ ویڈیو وائرل ہونے کے بعد شائقین کرکٹ بھی دی راک کو سوشل میڈیا پر فالو کر رہے ہیں اور سراہ رہے ہیں۔